काठमाडौं । अमेरिका र इजरायली रिपोर्टहरूका अनुसार, फ्लाईदुबईको विमान अपहरण (हाईज्याक) गर्ने प्रयास गर्ने अभियुक्त सह-पाइलटको योजना विमानलाई तेल अभिभको बेन गुरियन विमानस्थल वा सहरको कुनै अग्लो भवनमा ठोक्काउने रहेको थियो।

रिपोर्टहरूका अनुसार, ओमानका बासिन्दा रहेका यी अभियुक्तको कुनै आतङ्ककारी सङ्गठनसँग सम्बन्ध रहेको कुरा अहिलेसम्म प्रमाणित भएको छैन र उनले एक्लै यो कार्यलाई पूर्णता दिने मनसाय राखेका थिए।

संयुक्त अरब इमिरेट्सका एटोर्नी जनरलले गत बुधबार दुबईबाट तेल अभिभ जाँदै गरेको उडान एफजेड १०७३ मा सह-पाइलटले “आतङ्ककारी आक्रमण” गर्ने प्रयास गरेको बताएका छन्।

उनले ककपिटमा राखिएको आपत्कालीन बन्चरोले क्याप्टेनमाथि आक्रमण गरी उनलाई घाइते बनाएका थिए। त्यसपछि क्याप्टेनले कुनै किसिमले ककपिटको ढोका खोलेपछि यात्रुहरूले आक्रमणकारी सह-पाइलटलाई नियन्त्रणमा लिएका थिए। विमानमा रहेका अन्य क्रू मेम्बरले विमानलाई साउदी अरबमा अवतरण गराएका थिए।

इजरायलका प्रधानमन्त्री बेन्जामिन नेतान्याहूले सह-पाइलटको “इस्लामी उग्रवादी विचारका लागि ब्रेनवोस” गरिएको दाबी गरेका छन्। उनले क्याप्टेन, यात्रु र अन्य क्रू मेम्बरहरूले “९/११ जस्तै ठुलो विनाश” हुनबाट रोकेको बताए।

फ्लाईदुबईको सो उडानका सह-पाइलटबारे थप जानकारी बाहिर आएको छ। धेरै रिपोर्टहरूमा उनको नाम हामाम अल-हमामी बताइएको छ। युएईमा उनीसँग सोधपुछ जारी छ र इजरायली अधिकारीहरूलाई अनुसन्धानको जानकारी दिइँदै छ।

इजरायली मिडियाले अनुसन्धानसँग सम्बद्ध स्रोतहरूलाई उद्धृत गर्दै क्याप्टेन स्मित मच्छरमाथि आक्रमण गरेपछि सह-पाइलटको योजना सबै कुरा सामान्य रहेको देखाउने र यसरी विमानलाई इजरायलको हवाई क्षेत्रभित्र लैजाने रहेको बताएका छन्।

रिपोर्ट अनुसार सह-पाइलटको योजना बेन गुरियन विमानस्थलबाट विमान अवतरण गर्ने अनुमति प्राप्त गर्ने र त्यसपछि आफ्नो योजना कार्यान्वयन गर्ने रहेको थियो।

रिपोर्टहरूका अनुसार, त्यसपछि उनले १८० जनाभन्दा बढी यात्रु सवार बोइङ ७३७ म्याक्स विमानलाई विमानस्थल वा मध्य तेल अभिभको कुनै अग्लो भवनमा ठोक्काउने योजना बनाइरहेका थिए। उनको यो योजना ११ सेप्टेम्बर २००१ मा अमेरिकामा भएको अल-कायदाको आक्रमणजस्तै रहेको बताइएको छ।

स्रोतहरूका अनुसार, उनले एक्लै यस्तो गरेको हुन सक्ने सम्भावना सबैभन्दा बढी छ। उनको कुनै उग्रवादी सङ्गठन वा विदेशी सरकारका लागि काम गरेको कुरा बाहिर आएको छैन।

रिपोर्टहरूका अनुसार, सह-पाइलटले अनुसन्धानकर्ताहरूलाई यसअघि पनि तेल अभिभ जाने एक उडानलाई अपहरण गरी क्र्यास गराउने योजना बनाएको बताएका छन्। तर विमानमा आफ्नो परिचित व्यक्ति सवार रहेकाले पछि उनले सो इरादा छाडेका थिए।

युएई वा इजरायलका अधिकारीहरूले यस विषयमा तुरुन्तै कुनै टिप्पणी गरेका छैनन्।

युएईका एटोर्नी जनरल हमद अल-सामसीले शनिबार अनुसन्धानबाट घटनाको पूर्ण जानकारी, उद्देश्य र यससँग जोडिएका कुनै पनि लिङ्कको पत्ता लाग्ने बताएका छन्। उनले अनुसन्धान पूरा भएपछि यसको नतिजा सार्वजनिक गरिने बताए।

यस घटनापछि सुरक्षामा भएका ठुला त्रुटिहरूलाई लिएर पनि प्रश्नहरू उठिरहेका छन्। यसमा फ्लाईदुबईले सह-पाइलटलाई कसरी जागिर दियो र इजरायली यात्रुहरूले भरिएको विमान तेल अभिभ लैजाने अनुमति उनलाई कसरी मिल्यो भन्ने प्रश्न समावेश छन्।

क्षेत्रीय अधिकारीहरूका अनुसार, ओमानको सरकारी एयरलाइन ‘ओमान एयर’ ले ती सह-पाइलटलाई उडान भर्नबाट रोकेको थियो। उग्रवादी विचारलाई लिएर चिन्ता व्यक्त भएपछि उनलाई उडानको सट्टा प्रशासन (एडमिनिस्ट्रेशन) सँग सम्बन्धित जागिर दिइएको थियो।

अधिकारीहरूका अनुसार, पछि युएईको फ्लाईदुबईले उनलाई जागिर दियो। कम्पनीको सामान्य सुरक्षा जाँचमा उनीबारे उग्रवादसँग जोडिएका कुनै सङ्केतको पड्ताल गरिएको थिएन।

इजरायलको उड्डयन नियम अनुसार, इजरायलसँग औपचारिक कूटनीतिक सम्बन्ध नरहेका देशका नागरिक पाइलटले इजरायल जाने उडान चलाउन पाउँदैनन्। ओमान पनि त्यस्तै देशहरूमा पर्छ।

क्षेत्रीय अधिकारीहरूले आइतबार एसोसिएटेड प्रेसलाई बताए अनुसार उडानएफजेड १०७३ ले उडान भर्नुअघि युएईका अधिकारीहरूले इजरायललाई यात्रु र क्रू सदस्यहरूको सूची दिएका थिए।

इजरायलको आन्तरिक सुरक्षा एजेन्सी ‘सिन बेट’ ले विदेशी एयरलाइन्सका यस्ता सूचीहरूको जाँच गर्ने जिम्मेवारी यातायात मन्त्रालयको रहेको बताएको छ।

तर यातायात मन्त्री मिरी रेगेभले आफ्नो मन्त्रालयलाई यात्रु र क्रू सदस्यहरूको सूची नदिइएको बताएकी छन्। उनले विदेशी एयरलाइन्सका उडानहरूको सुरक्षाको जिम्मेवारी सिन बेट र विदेशमा जासुसी काम गर्ने एजेन्सी ‘मोसाद’को रहेको बताएकी छन्।

इजरायलका प्रधानमन्त्री बेन्जामिन नेतान्याहूले राष्ट्रिय सुरक्षा परिषद्का प्रमुखलाई इजरायल आउने विदेशी नागरिक उडानहरूको “सुरक्षासँग जोडिएका सबै पक्षहरू” को समीक्षा गर्न भनेका छन्।

अस्ट्रेलियाली अधिकारीहरू पनि सह-पाइलटको अस्ट्रेलियासँगको सम्बन्धबारे अनुसन्धान गरिरहेका छन्। स्थानीय मिडियालाई स्रोतहरूले बताए अनुसार उनले सन् २०१५ देखि २०१७ बिच अस्ट्रेलियामा अध्ययन गरेका थिए।