काठमाडौं। ललितपुरको च्यासलस्थित सत्तासमीकरणको प्रमुख दल नेकपा (एमाले) को केन्द्रीय कार्यालयबाट सुरक्षाकर्मी फिर्ता भएका छन्। त्यहाँ तैनाथ रहेको सशस्त्र प्रहरी बलको टोली सोमबारदेखि फिर्ता भएको पार्टी कार्यालयका सचिव भीष्म अधिकारीले जानकारी दिएका छन्।

कार्यालय सचिव अधिकारीका अनुसार च्यासलमा २०७८ सालमा पार्टी कार्यालय सञ्चालनमा आएदेखि नै सशस्त्र प्रहरी नियमित रूपमा खटिँदै आएका थिए।

“कहिले बढी, कहिले कम हुन्थे तर कम्तीमा पाँच जना सशस्त्र प्रहरी २४ सै घण्टा खटिने गरेका थिए,” अधिकारीले भने, “आइतबारसम्म खटिएको टोली सोमबारदेखि भने फिर्ता भएको छ र अहिले कार्यालयमा सुरक्षाकर्मी छैनन्।”

केही दिनअघि गृह मन्त्रालयले विशिष्ट व्यक्ति (भीभीआइपी र भिआइपी) को सुरक्षा तथा निजी सुरक्षा अधिकारीका रूपमा कार्यविधिविपरीत र तोकिएको मापदण्डभन्दा बढी खटाइएका सुरक्षाकर्मीहरूलाई तत्काल फिर्ता गरी आ-आफ्नो दरबन्दीमा खटिन निर्देशन जारी गरेको थियो।

गृह मन्त्रालयको उक्त कडाइ र मापदण्ड पालना गराउने नीतिकै निरन्तरतास्वरूप दलका कार्यालयहरूबाट समेत सुरक्षाकर्मी फिर्ता हुन थालेको देखिएको छ।