काठमाडौँ । सर्वोच्च अदालतका तत्कालीन न्यायाधीश रणबहादुर बमको हत्या प्रकरणमा सर्वस्वसहित जन्मकैदको सजाय भुक्तान गरिरहेका मुख्य योजनाकार मेघबहादुर थापा उर्फ ‘बाबु थापा’ स्वचालित हतियारसहित सर्लाहीबाट पुनः पक्राउ परेका छन्।

गत वर्ष २४ भदौमा भएको ‘जेनजी’ आन्दोलनको क्रममा काठमाडौँको सुन्धारास्थित केन्द्रीय कारागार (जगन्नाथदेवल) बाट फरार भएका उनलाई नेपाल प्रहरीले सर्लाहीको बागमती नगरपालिका–२ स्थित मिलनचोकमा रहेको आफ्नै निवासबाट नियन्त्रणमा लिएको हो।

विशेष सुराकीका आधारमा खटिएको प्रहरी टोलीले बुधबार राति छापा मारी थापालाई पक्राउ गरेको सर्लाहीका प्रमुख प्रहरी उपरीक्षक (एसपी) रवीन्द्रनाथ पौडेलले जानकारी दिए। पक्राउ पर्ने क्रममा थापाको साथबाट दुई थान स्वचालित पेस्तोल, तीनवटा म्यागजिन र १५ राउन्ड गोली बरामद भएको छ।

कारागारबाट भागेपछि भेष बदलेर तथा अरूको मोबाइल प्रयोग गरी नेपाल र भारतका विभिन्न क्षेत्रमा लुकिछिपी बस्दै आएका उनलाई आफ्नै घरमा आएको मौका पारी प्रहरीले घेराबन्दी गरेर नियन्त्रणमा लिएको हो। बरामद हतियार तथा खरखजानाका सम्बन्धमा उनीमाथि सर्लाही जिल्ला अदालतमा मुलुकी अपराध संहिता बमोजिम छुट्टै मुद्दासमेत चलाउने तयारी प्रहरीले गरेको छ।

चुरेभावर राष्ट्रिय पार्टीका तत्कालीन उपाध्यक्ष रहेका बाबु थापा राजनीतिक विवाद र सर्वोच्च अदालतको एक अन्तरिम आदेशसँग जोडिएको रिसइबीका कारण न्यायाधीश बमको हत्या योजना बुन्ने मुख्य व्यक्ति हुन्। २०६९ साल जेठ १८ गते ललितपुरको युएन पार्क नजिकै कुपण्डोलमा ललितपुरको बंगलामुखी मन्दिरबाट फर्कँदै गर्दा न्यायाधीश बममाथि गोली प्रहार गरी हत्या गरिएको थियो।

उक्त चर्चित हत्याकाण्डपछि फरार रहेका थापालाई प्रहरीको केन्द्रीय अनुसन्धान ब्युरो (सीआईबी) ले २ वर्ष ७ महिनाको निरन्तर अनुसन्धानपछि २०७१ साल पुसमा पहिलोपटक पक्राउ गरेको थियो। त्यसबेला प्रहरीले यस सफलतालाई आफ्नो दायित्व र अनुसन्धानको ठूलो उपलब्धि मानेको थियो।

जघन्य अपराधमा अदालतबाट दोषी ठहर भई जन्मकैद काटिरहेका थापा कारागार सुरक्षा व्यवस्थामा आएको सङ्कटको फाइदा उठाउँदै फरार भएपछि प्रहरीले उनको खोजी कार्यलाई उच्च प्राथमिकतामा राखेको थियो। पुनः पक्राउ परेका उनलाई हतियार सम्बन्धी नयाँ कसुरमा अनुसन्धान पूरा गरी थप सजाय र बाँकी कैद भुक्तानीका लागि पुनः कारागार चलान गरिने प्रहरी प्रशासनले जनाएको छ।