भक्तपुर । चारैतिर विजयादशमीको उल्लास र उमङ्ग छाएको छ। बजारमा नयाँ कपडा र खानपानका सामान किन्नेहरूको भिडभाड बढेको छ भने घरघरमा चाडपर्वको तयारी तीव्र रूपमा भइरहेको छ। तर, भक्तपुरका किसानहरूलाई भने दसैंको रमाइलोभन्दा पनि खेतमा पाकेर पहेँलपुर भएको धान थन्क्याउने चटारो परेको छ।

वर्षभरिको मुख्य अन्नबाली भित्र्याउने बेला र बडा दसैं पर्व एकै समयमा परेपछि यहाँका किसानलाई अहिले दिनरात काम भ्याइनभ्याइ भएको छ। एकातर्फ चाडपर्वको रौनक छ भने अर्कातर्फ मौसमको अनुकूलतालाई ध्यानमा राख्दै पाकेको धान समयमै काट्न र भित्र्याउन किसानहरू खेतमै व्यस्त देखिन्छन्।

दसैंको टीकाको दिन नजिकिँदै जाँदा गाउँघरमा पाहुनापासाको स्वागत र चाडपर्वको तयारी गर्नुपर्ने समयमा धान काट्ने कामले किसानलाई फुर्सद दिएको छैन। परिवारका सबै सदस्य खेतमै खटिएर धान काट्ने, दाइँ गर्ने र भित्र्याउने काममा जुटेका छन्। धान समयमै थन्क्याउन नसकिएमा वर्षा वा प्रतिकूल मौसमले बाली बिग्रन सक्ने डरले किसानहरूले चाडपर्वको खुसीलाई थाती राखेर पसिना बगाइरहेका हुन्।