काठमाडाैं। पूर्वराजा ज्ञानेन्द्र शाहले बडा दशैँ (विजया दशमी) २०८३ को शुभ अवसरमा सम्पूर्ण नेपालीहरूमा शुभकामना व्यक्त गरेका छन्।

निर्मल निवासस्थित संवाद सचिवालयद्वारा जारी शुभकामना सन्देशमा उनले प्राकृतिक प्रकोपको दुःख र पीडाका बीच पनि नेपालीहरूले आफ्ना चाडपर्व र संस्कृति धान्नुपरेको उल्लेख गरेका छन्।

भदौमा भोटेकोशीमा आएको भीषण बाढी र असोजको अविरल वर्षाका साथै बुढीगण्डकीको बाढीबाट भएको जनधनको क्षतिप्रति दुःख व्यक्त गर्दै उनले प्रकृति नबिथोलिने गरी सन्तुलन र संरक्षणको नीति अवलम्बन गर्नुपर्नेमा जोड दिए।

पूर्वराजा शाहले क्षतिग्रस्त भौतिक संरचनाको पुनर्निर्माण र पीडित नागरिकहरूको शीघ्र पुनस्थापनालाई प्राथमिकता दिन आग्रह गरे। बाह्य सहयोग लिँदा देशको स्वाभिमान र स्थानीय परम्परा जोगाउन कूटनीतिक चातुर्य अपनाउनुपर्ने उनको भनाइ थियो।

देशको वर्तमान राजनीतिक, संवैधानिक, न्यायिक, आर्थिक र प्रशासनिक क्षेत्र अन्योलको अवस्थामा रहेको भन्दै उनले प्रजातान्त्रिक विधिलाई सुदृढ गर्दै भूराजनीतिक स्थितिमा राष्ट्रियता र मौलिक मूल्यलाई दृढ बनाउनुपर्ने आवश्यकता औँल्याए।

साथै, राज्य सञ्चालनमा आएको नयाँ पुस्ताले देशवासीको मुहारमा खुसी ल्याउने आशा व्यक्त गर्दै उनले विभाजित नभई एकताबद्ध र आत्मनिर्भर नेपाल निर्माणका लागि आह्वान गरे।

शुभकामना सन्देश-

प्यारा नेपाली दिदी बहिनी तथा दाजु भाइहरु,

सदा झैं यस बर्ष पनि नेपालको सनातनी परम्परा र संस्कृति अनुरुप सत्य, सदाचार तथा मर्यादाका निम्ति मनाइने बडा दशैं हामी नेपालीको घर आंगनमा आइपुगेको छ ।

विभिन्न आरोह अवरोहहरु देख्दै, भोग्दै, सहँदै अनि सम्हालिदै आएका हामी नेपालीहरु प्राकृतिक प्रकोपको दुःख र पीडा कै बिचमा पनि आफ्ना चाडपर्व, धर्म, संस्कृति तथा रितिरिवाज धान्नु पर्ने अवस्थामा उभिएका छौं ।

यो बर्षको बर्षादकाल पनि हाम्रा निम्ति सुखद रहेन। भदौ दश गते भोटेकोशीमा पसेको भिषण बाढीले बिभिन्न जिल्लाका नदी तटीय क्षेत्रमा र यही असोजमा परेको अविरल बर्षा तथा दशैंको मुखैमा आएको बुढीगण्डकी बाढीका कारण जनधनको अपार क्षति हामीले भोग्नु पर्‍यो ।

प्रकृतिका नियमहरु न्यायसंगत छन् तर भयानक पनि । त्यहाँ कुनै कमजोर, करुणा हुँदैन । कारण र परिणामहरु अलग गर्न सकिदैन र अनिवार्य छन् । प्रकृति आफैमा एक नियमित र नियामक शक्ति हो , यसको गति स्वभाविक हुन्छ ।

त्यही तात्यूक र तार्किक सत्यलाई स्वीकार गरेर हामीले प्रकृति नबिथोलिने गरी सन्तुलन र संरक्षणको नीति अबलम्बन गर्नु पर्दछ । यसबाट आउने दुःख, बाढा र पीडालाई न्यूनिकरण गर्न हामी सबैले पूर्व तयारी र सावधानीका साथ सही शक्ति र सद्बुद्धिको प्रयोग गर्न सक्नु पर्दछ ।

शोकलाई शक्तिमा र निराशालाई आशामा बदल्दै जीवनको यात्रा तय गर्नु पर्ने हाम्रो बाध्यता रहेको तथ्य सर्वविदित नै छ । जनताको पीडा नै सिङ्गो देश र राज्यको पनि साझा पीडा हो भन्ने मान्यताको जगमा उभिएको हाम्रो भूमिका आगामी दिनहरुमा पनि नेपाल र नेपालीको पक्षमा नै रही रहनेछ । 

क्षतिग्रस्त भएका भौतिक संरचनाहरुको पुननिर्माण तथा पीडित नागरिकहरुको शीघ्रातिशीघ्र यथोचित पुर्नस्थापनाको कार्यलाई प्रमुख प्राथमिकतामा राखेर काम गर्नु पर्ने अहिलेको आवश्यकता हो । तर यस किसिमको कार्यमा बाह्य सहयोग लिंदा देशको स्वाभिमान, स्थानीय परम्परा जोगिने गरि कूटनैतिक चार्तुयता अपनाउनु पर्ने हुन्छ । 

नेपाल केबल भूगोल मात्र होइन, यो हाम्रो साझा इतिहास, आस्था, संस्कृति, परम्परा अनि चिनारी पनि हो । देशको कठिन समयमा एक अर्कामा भाइचारा कायम राख्नु, एक क्षेत्रका नागरिकको पीडामा अर्को क्षेत्रका नागरिकले साथ दिनु र राष्ट्रिय हितलाई व्यक्तिगत स्वार्थ भन्दा माथि राख्नु नै साँचो देशभक्ति हुन्छ । 

यतिखेर हाम्रो देश किन अस्तव्यस्त स्थितिमा रहेकोछ । हाम्रो राजनीतिक, सम्बैधानिक, न्यायिक, आर्थिक, सामाजिक, प्रशासनिक एवं व्यवसायिक क्षेत्र अन्यौेल र अलमलको अवस्थामा किन देखिन्छ ।

हाम्रो राज्य प्रणालीलाई कसरी लाने, हाम्रा प्रजातान्त्रिक आधारलाई कसरी बलियो पार्ने, हाम्रो अर्थतन्त्रलाई के गरेर उकास्ने भन्ने सवाल यतिबेला किन उत्पन्न भएको छ ।

यी सबैलाई सच्याएर, मिलाएर, प्रजातान्त्रिक विधि प्रकृयालाई सुदृढ पार्दै विद्यमान विश्व परिवेश र भूराजनीतिको स्थितिमा हाम्रो राष्ट्रियता तथा मौलिक मुल्यलाई दृढ पार्नु जरुरी छ । जोश जाँगर बोकेर राज्य संचालनमा खडा भएको नवपुस्ताले देशवासीको मुहार हँसिलो रसिलो पार्छ भन्ने अभिलाषा राखिएको छ । 

नेपालीको मनमा करुणा, समाजमा सद्भाव र देशभक्तिको भावना अझ बलियो बन्दै जावोस् । विभाजित होइन, एकताबद्ध नेपाल, परनिर्भर होइन आत्मनिर्भर नेपाल, कमजोर होइन सबल र सक्षम नेपाल निर्माण गर्ने सोच हामी सबैमा जागृत होस् । 

असत्य माथि सत्यको अनि आशुर्य शक्ति माथि दैवी शक्तिको बिजयको उल्लासको रुपमा मनाईने दशैंका अवसरमा शक्तिकी प्रतिक श्री नवदुर्गा भवानीले हामीलाई सत्य, न्याय र शक्तिको मार्गमा हिड्ने सत्बुद्धि प्रदान गरुन् ।
जय नेपाल !  सम्बाद सचिबालय
  निर्मल निवास