काठमाडौं । अमेरिकी राष्ट्रपति डोनाल्ड ट्रम्पले राष्ट्रपतिको पदका लागि अहिले नै आफ्नो उत्तराधिकारीबारे चर्चा गर्नु हतारो हुने बताएका छन्।

ओभल अफिसमा पत्रकारहरूसँग कुराकानी गर्ने क्रममा ट्रम्पलाई उपराष्ट्रपति जेडी भान्सले राष्ट्रपतिको दौडमा उम्मेदवारी दिएको खण्डमा उनले समर्थन गर्छन् कि गर्दैनन् भनी प्रश्न सोधिएको थियो।

विशेष कुरा के छ भने, ट्रम्पलाई यो प्रश्न सोध्दा उपराष्ट्रपति भान्स ठीक उनकै पछाडि उभिरहेका थिए।

ट्रम्पले भान्सको प्रशंसा गर्दै उनलाई “अत्यंत प्रतिभावान” र “निकै राम्रो व्यक्ति” भनेका छन्। तथापि, उनले हाल भविष्यको राजनीतिबारे चर्चा गर्ने सही समय नआएको स्पष्ट पारे।

ट्रम्पले भने, “अहिले धेरै चाँडो हुन्छ। हामीले पहिले मध्यवधि (मिडटर्म) निर्वाचन पार गर्नुपर्छ। त्यसपछि मात्र परिस्थिति कस्तो हुन्छ, त्यसबारे विचार गर्नेछौँ।”

उल्लेखनीय छ कि जेडी भान्सले पत्रकार मार्क हेल्परिनलाई दिएको एक अन्तर्वार्तामा आगामी राष्ट्रपति चुनाव लड्ने वा नलड्ने विषयमा अहिलेसम्म कुनै निर्णय नभएको बताएका थिए।

यद्यपि, उनले यदि आफूले चुनाव लड्ने निर्णय गरेको अवस्थामा राष्ट्रपति ट्रम्पले आफूलाई समर्थन गर्नेछन् भन्ने विश्वास व्यक्त गरेका थिए।