काठमाडौं। सीमामा बढिरहेको तनाव बढाउन एक अर्कालाई जिम्मेवार भनिरहेका भारत र चीन अन्ततः तनाव घटाउने सहमतिमा पुगेका छन् । तनाव घटाउनको लागि दुवै देशका विदेश मन्त्रीहरुबीच रुसको राजधानी मस्कोमा छलफल भयो । छलफलपछि दुवै देशका विदेशमन्त्रीहरुले ५ बुँदे लिखित सहमति गरेका छन् । दुई देशबीचको तनाव घटाउने, सीमा क्षेत्र लाइन अफ एक्चुअल कन्ट्रोलमा सैनिक गतिविधि नियन्त्रित गर्ने र स्थितिलाई सहज बनाउने लगायतका विषयमा सहमति भएको हिन्दूस्तान टाइम्सले लेखेको छ ।

मस्कोमा भारतीय विदेश मन्त्री एस जयशंकर र चिनियाँ समकक्षी वाङ यीबीच करिब साढे २ घण्टा छलफल भएपछि यस्तो सहमति भएको समाचारमा जनाइएको छ । शाङघाइ कोअपरेसन अर्गनाइजेसन (एससीओ) को कार्यक्रममा सहभागी हुन् भारत र चीन दुवै मुलुकका विदेश मन्त्री रसियामा छन्। यही क्रममा बिहीबार बेलुका दुवै समकक्षीबीच छलफल भएको र त्यो सहमतिलाई लिखित रुपमा शुक्रबार बिहान जारी गरिएको हो ।

दुवै पक्षले संयुक्त रुपमा जारी गरेको वक्तव्यमा भारत–चीन सम्बन्धमा राजनीतिक नेतृत्वबाट विकास हुने सहमतिको श्रृङ्खलालाई दुवै पक्षले अनुसरण गर्ने तथा मतभेदलाई विवादित बनाउन नदिने सहमति भएको जनाइएको छ । साथै वक्तव्यमा अहिले सीमामा जे भइरहेको छ त्यो दुवै देशको प्राथमिकताको विषय नभएको उल्लेख छ । सीमामा रहेका सैनिकबीच वार्ता जारी राख्ने, सैनिक सक्रियतालाई कम गर्न, दूरी कायम गर्ने र स्थितिलाई सहजीकरण गर्ने विषयमा सहमति भएको उल्लेख छ।

चीन–भारतबीचको सीमासँग सम्बन्धित सबै सम्झौता र प्रोटोकलहरुको पालना गर्ने, सीमा क्षेत्रमा शान्ति कायम राख्ने र तनाव बढाउनसक्ने खालका गतिविधिलाई नियन्त्रणमा राख्ने सहमति भएको छ। दुवै मुलुकका विशेष प्रतिनिधिबीच छलफलका लागि संयन्त्र तयार गर्ने विषयमा पनि छलफल भएको थियो । दुवै देशका मन्त्रीहरुले स्थितिलाई सहज बनाउन सहमति जनाएका छन्। सीमा क्षेत्रमा शान्तिपूर्ण अवस्था कायम गर्न र सम्बन्ध सुधारका लागि नयाँ विन्दूबाट समझदारी गर्ने विषयले छलफलमा स्थान पाएको थियो।

गलवान उपत्यकामा दुई देशका सैनिकबीच हिंसात्मक भिडन्त भएयता भारत र चीन सीमामा तनाव कायमै छ। यो झडपमा २० जना भारतीय सैनिक मारिएका थिए । चीनतर्फ पनि हताहती भएको खबर आए पनि चीनले हताहतीको स्पष्ट संख्या बताएको छैन । दुवै मुलुकले एक अर्कालाई आक्षेप लगाउँदै आएका छन्। पछिल्लो समय चीनले भारतीय सेनाले घुसपैठ गरेको आरोप लगाएको थियो। अर्कातिर भारतले चिनियाँ सैनिकले उत्तेजित बनाउन खोजेको दोषारोपण गरेको थियो।