काठमाडौं। ठगी आरोपमा ओलम्पिया वर्ल्ड स्कुलका दुईजना सञ्चालक पक्राउ परेका छन्। काठमाडौंको ओलम्पिया वर्ल्ड स्कुलका सञ्चालकहरुले पौने ३ करोड रुपैया ठगी गरेको आरोपमा प्रहरीले सञ्चालक शिरिष खड्का र सुरेन्द्र महर्जनलाई पक्राउ गरेको हो। महानगरीय प्रहरी परिसर काठमाडौंका प्रमुख अशोक सिंहले दुईजनालाई पक्राउ गरिएको जानकारी दिए।

कोटेश्वरको जग्गामा बैना लिएर जग्गा नदिएको र बैना पनि फिर्ता नगरेकाले उनीहरुलाई ठगी मुद्दामा अदालतबाट जारी भएको वारेन्टका आधारमा पक्राउ गरिएको हो।

उनीहरुले स्कुलको नाममा कोटेश्वरमा रहेको २ रोपनी १४ आना २ पैसा जग्गा विक्री गर्न कृष्णप्रसाद देवकोटासँग वैशाख २०७६ मा २ करोड ७५ लाख बैना लिएका थिए। तर जग्गा अर्कैलाई बेचेपछि उनीहरुविरुद्ध उजुरी परेको थियो। सोही उजुरीको आधारमा प्रहरीले पक्राउ गरेको हो। प्रहरीका अनुसार अन्य सञ्चालकहरु भने फरार रहेका छन्।