काठमाडौं। एक जना मेडिकल विषयका प्राध्यापकले आफ्नी छोरीको कोभिशिल्ड कोरोना खोपका कारण ज्यान गएको भन्दै अदालतमा मुद्दा हालेका छन् । उनकी कृतक छोरी पनि डाक्टर नै थिइन् । यी प्राध्यापकले भारतको मुम्बइस्थित बाम्बे हाइकोर्टमा मुद्दा दायर गर्दै १० अर्ब भारतीय रुपैयाँ क्षतिपूर्ति माग गरेका छन् । याचिकामा उनले आफ्नी डाक्टर छोरीको मृत्यु कोभिशिल्ड खोपको साइड इफेक्टका कारण भएको आरोप लगाएका छन् ।

यी चिकित्सकले आफ्नो याचिकामा कोभिशिल्ड खोप उत्पादन गर्ने भारतको सीरम इन्स्टिच्युट अफ इण्डिया, यसका सहयोगी बिल गेट्स, भारतको केन्द्र सरकार र राज्य सरकारका अधिकारीहरुलाई विपक्षी बनाएका छन् । भारतीय अखबार दैनिक भास्करले याचिकाकर्ता दिलिप लुनावतलाई उद्धृत गर्दै लेखेअनुसार उनकी ३३ वर्षकी छोरी स्नेहल लुनावत नागपुरको एक मेडिकल कलेजमा सिनियर लेक्चरर थिइन् । उनलाई २८ जनवरी २०२१ मा नासिकमा कोभिशिल्डको पहिलो डोज दिइएको थियो ।

५ फेब्रुअरीमा उनलाई धेरै टाउको दुख्न थाल्यो । डाक्टरसँग सम्पर्क गरेपछि उनलाई माइग्रेनको औषधि दिइयो । यो खाएपछि उनलाई टाउको दुख्न कम भयो । त्यसपछि ६ फेब्रुअरीमा उनी गुगांव गइन् । ७ फेब्रुअरीका दिन बिहान २ बजे उनलाई थकानका साथ बान्ता भयो । नजिकैको आर्यन अस्पतालमा भर्ना गरेपछि उनकी छोरीलाई उनको मस्तिस्कमा रक्तस्राव भइरहेको बताइयो । त्यहाँ न्यूरो सर्जन नभएका कारण उनलाई अर्को अस्पताल लगियो ।

त्यहाँ डाक्टरहरुले स्नेहलको दिमागमा रगतका ढिक्का परेको हुन सक्ने आशंका गरे । त्यसपछि स्नेहललाई ब्रेन ह्यामरेज भयो । डाक्टरहरुले रगतका ढिक्का हटाउन सर्जरी गरे । त्यसपछि स्नेहल १४ दिनसम्म भेन्टिलेटरमा रहिन् । तर, उनको अवस्थामा कुनै सुधार भएन । १ मार्च २०२१ मा उनको मृत्यु भयो ।

लुनावतका अनुसार उनकी छोरी स्वास्थ्यकर्मी थिइन् त्यसैले उनलाई खोप लगाउनको लागि बाध्य पारियो । उनका अनुसार ड्रग कन्ट्रोलर जनरल अफ इण्डिया र अल इण्डिया इन्स्टिच्युट अफ मेडिकल साइन्स (एम्स) ले खोपको सुरक्षाका विषयमा गलत बयान दिएका छन् । याचिकाकर्ताले सिरम इन्स्टिच्युटमाथि झुटो प्रतिक्रिया दिएको आरोप लगाएका छन् । उनका अनुसार खोपको कुनै खराब असर भेटिएन भन्नु गलत हो ।

याचिकामा दावी गरिएअनुसार भारतको केन्द्र सरकारको आफटु इफेक्ट फलोइङ इम्युनाइजेसन कमिटीले २ अक्टोबर २०२१ मा स्नेहलको मृत्यु खोपको साइड इफोक्टबाट भएको स्वीकार गरेको थियो । लुनावतले राज्यका जिम्मेवार अधिकारी र कोभिशिल्ड खोप निर्माता सिरम इन्स्टिच्युट पुणेबाट आफूले क्षतिपूर्तिको रकम पाउनुपर्ने बताएका छन् । उनले स्नेहललाई शहीद घोषणा गरिनुपर्ने र उनको नाममा समर्पित एक शोध संस्थान पनि खोलिनुपर्ने माग गरेका छन् ।