काठमाडौं । संयुक्त अरब इमिरेट्सका सबैभन्दा वरिष्ठ रब्बीले विशेष गरी यहूदीहरूका लागि बनाइने देशको पहिलो बस्तीको योजनाको बारेमा जानकारी दिएका छन्। रब्बी डा. एली अबादी हाल गल्फ यहूदी समुदाय संघका प्रमुख छन्। यो योजनाले युएइको बढ्दो यहूदी जनसंख्यालाई आफ्नै होटल, किनमेल केन्द्र, विद्यालय र धार्मिक स्थलहरू निर्माण गर्न सक्षम बनाउने लक्ष्य राखेको छ।

खाडीको यो देश अहिले करिब दुई हजार यहूदीहरूको घर हो। सन् २०२० मा अमेरिकी पहलपछि युएई र बहराइनले इजरायलसँग कूटनीतिक सम्बन्ध स्थापना गरेका थिए । यसलाई ‘अब्राहम एकर्ड्स’ भनिन्थ्यो। यो सम्झौतापछि युएईमा यहुदीहरुको संख्या दोब्बर भएको छ ।

हालैका वर्षहरूमा इजरायलसँग युएई र बहराइनबीचको सम्बन्ध द्रुत गतिमा बढेको छ। यसै वर्षको फेब्रुअरी महिनामा इजरायलका राष्ट्रपतिले संयुक्त अरब इमिरेट्सको भ्रमण गरेका थिए । इजरायली राष्ट्रपति इसाक हर्जोगले यस भ्रमणमा इजरायल युएईको सुरक्षामा दृढताका साथ खडा रहेको बताए ।

हालै संयुक्त अरब इमिरेट्समा इफ्तार पार्टीलाई लिएर विवाद भएको थियो । इजिप्टियन कप्टिक चर्चसँग सम्बन्धित सिख, बोहरा, हिन्दू, बौद्ध, यहूदी र इसाई लगायत छवटा फरक धर्मका मानिसहरूले इफ्तार भोजमा भाग लिएका थिए र देशको इस्लामिक मामिला विभागले आयोजना गरेको थियो।

यो पहललाई कतिपयले स्वागत गरेका छन् भने कसैले अस्वीकार गरेका छन् । बीबीसी अरेबिक सेवाको रिपोर्टका अनुसार दुबई इफ्तारमा यहुदी धर्म समावेश गर्नुलाई इजरायलसँगको सम्बन्धलाई सामान्य बनाउने प्रयासको रूपमा आलोचकहरूले आलोचना गरेका छन्।

‘यो इमिराती समाजमा इजरायली घुसपैठ हो’ युएई सरकारको नीतिको विरोध गर्ने अहमद अल शैबाले बीबीसी अरेबिक सेवालाई भने । उनले इमिराती जनता सहअस्तित्व र सहिष्णुताका ठूलो समर्थक हुन् तर अहिले इमिराती जनतालाई बाध्य पारिएको बताए।