काठमाडौं । अमेरिकी पूर्व राष्ट्रपति डोनाल्ड ट्रम्पले यसै वर्ष फेब्रुअरीमा आफ्नै सामाजिक सञ्जाल ट्रुथ सोसल सुरु गरेका थिए । अब यो एप नि:शुल्क आईफोन एपको सूचीमा नम्बर एक भएको छ। जहाँ ट्विटर यो सूचीमा दोस्रो नम्बरमा छ। ट्विटरका मालिक एलन मस्कले पनि यसलाई स्वीकार गरेका छन् ।

एलन मस्कले ४४ अर्ब डलरमा ट्विटर खरिद गरेपछि ट्रुथ सोसल एप्पल एप स्टोरको नि:शुल्क एप श्रेणीको शीर्ष स्थानमा छ । मस्कले यस सम्बन्धमा स्क्रिनसट पनि ट्वीट गरेका छन् ।

सोमबार सम्झौताको घोषणा नभएसम्म ट्रुथ सोशल डाउनलोड चार्टमा ५२ औं र ट्विटर ३९ औं स्थानमा थियो। सेन्सर टावरको रिपोर्ट अनुसार ट्रुथ सोसलको डाउनलोड अप्रिल १८ देखि अप्रिल २५ सम्मको एक हप्तामा ७५,००० पुगेको छ।

अर्थात् गत साताको तुलनामा यसमा १ सय ५० प्रतिशतले वृद्धि देखिएको छ । सेन्सर टावरले मोबाइल एप्स मेट्रिक्स निगरानी गर्दछ। ट्रुथ सोसल एप लन्च भएदेखि हालसम्म १४ लाख पटक डाउनलोड भइसकेको रिपोर्टमा उल्लेख छ ।

डोनाल्ड ट्रम्प ट्विटरबाट प्रतिबन्धित थिए। त्यसपछि उनले आफ्नै सोसल मिडिया एप लन्च गर्ने घोषणा गरेका थिए । त्यसपछि उनले ट्रुथ सोसल नामबाट एप सुरु गरे । ट्रुथ सोसल अझै पनि सूचीमा ट्विटर र टिकटकभन्दा माथि छ।

यसबारे मस्कले ट्वीट गरेका छन् कि ट्रुथ सोसलले अहिले एप्पल स्टोरमा ट्विटर र टिकटकलाई पछाडि पारिदिएको छ । यसअघि ट्रम्पले आफू ट्विटरमा नआउने बताएका थिए । उनले ट्रुथ सोसलमा मात्र पोस्ट गर्नेछन्। उनले ट्वीटरलाई प्रतिस्पर्धाको रुपमा नहेरेको पनि बताए ।