काठमाडौं । रुस र युक्रेनबीचको युद्ध चर्किरहेको देखिन्छ । एकातिर अमेरिकासहित युरोपका धेरै देश युक्रेनको समर्थनमा खुलेर अगाडि आएका छन् भने अर्कोतिर रुस पनि पछि हट्न तयार छैन । युक्रेनले पनि युद्धको बीचमा युद्ध अपराधको दाबी गरिरहेको छ।

युक्रेनका राष्ट्रपति भोलोदिमिर जेलेन्स्कीले युद्धको बीचमा कीभमा उपस्थित सञ्चारमाध्यमलाई निरन्तर ब्रिफिङ दिइरहेका छन् । उनले शुक्रबार पनि यस्तै ब्रीफिङ गरेका थिए, जसमा उनले रुसविरुद्ध निकै सनसनीपूर्ण आरोप लगाएका थिए । जेलेन्स्कीले भने कि रुसी सेनाले युक्रेनका करिब ५ लाख मानिसलाई जबरजस्ती रुस लिएर गएको छ ।

पोल्यान्डका सञ्चारमाध्यमलाई सम्बोधन गर्दै जेलेन्स्कीले रुसले युक्रेन र संयुक्त राष्ट्रसंघलाई पनि चुनौती दिएको बताए । उनले राष्ट्रसंघका महासचिव एन्टोनियो गुटेरेसको कीभ भ्रमणका क्रममा भएको मिसाइल आक्रमणले पुटिनको नियत देखाएको बताए ।

उनले रुसी सेनाले दक्षिण र पूर्वमा अगाडि बढ्ने प्रयास गरिरहेको तर युक्रेनी सेनाले उचित जवाफ दिइरहेको बताए । जेलेन्स्कीले राष्ट्रसंघको सहयोगमा छिट्टै मारियुपोलमा फसेका मानिसहरूलाई सुरक्षित स्थानमा पुर्‍याउने बताए ।

रसिया र युक्रेनबीचको युद्धमा शान्ति वार्ता गर्न प्रयासरत संयुक्त राष्ट्र संघका प्रमुख एन्टोनियो गुटेरेसले शुक्रबार युक्रेनका राष्ट्रपति जेलेन्स्कीसँग भेट गरेका छन् । युक्रेनी राष्ट्रपति भोलोडिमिर जेलेन्स्कीसँगको भेट भएको एक घण्टापछि युक्रेनको राजधानी कीभमा दुईवटा मिसाइल आक्रमण भएको थियो।

यस हमलामा गुटेर्रेसको टोलीका कुनै सदस्यलाई क्षति पुगेको छैन, तर अचानक भएको आक्रमणबाट गुटेर्रेस छक्क परेका छन् । उनले आक्रमणको निन्दा समेत गरेका छन् ।

संयुक्त राष्ट्र महासचिव एन्टोनियो गुटेर्रेसले युक्रेनी राष्ट्रपति भोलोडिमिर जेलेन्स्कीसँग मात्र भेटेका होइनन्। बरु यसअघि उनले रुसी राष्ट्रपति भ्लादिमिर पुटिनसँग पनि मस्कोमा भेट गरेका थिए । दुवैबीच लामो कुराकानी भयो । तर, लामो छलफलपछि पनि दुवैले कुनै निष्कर्षमा पुग्न सकेनन् ।

भेटका क्रममा संयुक्त राष्ट्रका महासचिवले पुटिनसँग विशेषगरी मारियुपोलसँगको अवस्थाबारे छलफल गरे। उनले रुसलाई त्यहाँ कम्तिमा केही दिन युद्धविराम गर्न आग्रह गरे, ताकि स्टिल प्लान्टमा फसेका नागरिकहरू त्यहाँबाट सुरक्षित ठाउँमा शरण लिन सकून्।

यसबारे पुटिनले भनेका थिए ‘धेरै दिनदेखि गोलाबारी चलिरहेको छैन, मानिसलाई कतै जानबाट रोकिएको छैन । युक्रेनले नै आफ्ना जनतालाई बन्धक बनाएको छ । ताकि तिनीहरूको समर्थन लिएर उसले आफ्नो सैन्य शक्ति फेरि जम्मा गर्न सकोस्।’