काठमाडौं । इरानमा महसा अमिनीको गृहनगरमा शोक मनाउन जम्मा भएकालाई तितरबितर पार्न प्रहरीले गोली चलाएको छ । महसाको गृहनगर सकिजमा हजारौं मानिसहरू शोक मनाउन भेला भएका थिए, जसमा प्रहरीले गोली चलाएको थियो। यद्यपी गोलीबारीमा कुनै हताहतीको विवरण भने आएको छैन ।

महसाको मृत्यु भएको ४० दिन भइसक्यो र उनको मृत्युपछि सुरु भएको आन्दोलन अझै जारी छ । उनको मृत्युको ४० दिन पूरा भएको अवसरमा बुधबार उनको चिहानमा हजारौं मानिस भेला भएका थिए । मानव अधिकार समूहका सदस्यहरू र प्रत्यक्षदर्शीहरूले भने कि अधिकारीहरूले मानिसहरूमाथि गोली चलाए र भीडमा अश्रु ग्यास पनि प्रहार गरे।

बुधबार साकिजमा ठूलो संख्यामा पुलिस बल तैनाथ गरिएको थियो र कुर्दिश प्रान्तका अन्य क्षेत्रहरूमा पनि पुलिसहरू उपस्थित थिए। कसैको मृत्यु भएको ४० दिनपछि इरानमा विशेष शोक सभा आयोजना गरिन्छ, जसका लागि अमिनीको गृहनगरमा हजारौं मानिस भेला भएका थिए।

सामाजिक सञ्जालमा धेरै भिडियोहरु छन्, जसमा हजारौं मानिस सडकमा हिँडिरहेको स्पष्ट देखिन्छ । तिनीहरू कुनै पनि माध्यमबाट अमिनीको चिहानमा पुग्न खोजिरहेका छन्।

भिडियोमा मानिसहरू “महिला, जीवन, स्वतग्त्रता” र “तानाशाहको मृत्यु” जस्ता नारा लगाएको सुन्न सकिन्छ। तर, सो अवसरमा अमिनीका परिवारका सदस्यहरू पनि उपस्थित थिए वा थिएनन् भन्ने स्पष्ट भएको छैन ।

परिवारका एक नजिकका सदस्यले बीबीसीलाई गुप्तचर अधिकारीहरूले अमिनीका बुबालाई कुनै पनि उत्सव आयोजना नगर्न दबाब दिएको बताए। महसालाई हिजाब लगाउने नियम उल्लंघन गरेको आरोपमा पक्राउ गरिएको थियो। त्यसपछि तेहरानको अस्पतालमा उनको मृत्यु भएको हो ।

उनी तीन दिनदेखि कोमामा थिइन् । महसालाई प्रहरीले हिरासतमा कुटपिट गरेको परिवारको आरोप छ । तर, अधिकारीहरुले भने यसलाई अस्वीकार गरेका छन् ।