काठमाडौं । दिल्लीका उपमुख्यमन्त्री मनिष सिसोदियाले गुजरात र हिमाचल प्रदेशको विधानसभा चुनावको जारी मतगणनाको बीचमा आम आदमी पार्टी राष्ट्रिय पार्टी बन्न लागेको बताएका छन्।

दिल्ली र पञ्जाबमा भारी बहुमतका साथ सरकार बनाएपछि अहिले गुजरातमा करिब ६ देखि ७ सिटमा पार्टी अगाडि छ । तर, नतिजा स्पष्ट हुन समय लाग्नेछ ।

यी दुई राज्यमा प्राप्त भोटको प्रतिशतले आम आदमी पार्टीलाई राष्ट्रिय पार्टीको दर्जा दिन सक्छ। गोवामा पनि पार्टीका दुई विधायक छन्।

मनिष सिसोदियाले ट्वीट गरे, “गुजरातका जनताको भोटले आज आम आदमी पार्टी राष्ट्रिय पार्टी बनिरहेको छ। पहिलो पटक शिक्षा र स्वास्थ्यको राजनीतिले राष्ट्रिय राजनीतिमा छाप छोड्दैछ। यसका लागि सम्पूर्ण देशलाई बधाई छ। ।”

दुई घण्टाभन्दा बढीको ट्रेन्डमा भाजपाले गुजरातमा स्थिर अग्रता बनाएको छ। पार्टी करिब १५० सिटमा अगाडि छ ।

चार वा सोभन्दा बढी प्रदेशमा क्षेत्रीय दलको मान्यता पाएपछि पार्टीले राष्ट्रिय पार्टीको हैसियत पाउँछ। लोकसभा र विधानसभाको निर्वाचनमा सम्बन्धित दलले चार वा सोभन्दा बढी राज्यमा ६ प्रतिशत वा सोभन्दा बढी मत प्राप्त गरेमा वा कुनै दलले ३ राज्यलाई जोडेर ३ प्रतिशत लोकसभा सिट जित्यो भने राष्ट्रिय पार्टी बन्छ । अर्थात् ११ सिट जित्न आवश्यक छ तर यी सिट एउटै राज्यबाट हुनुहुँदैन ।