काठमाडौं । पाकिस्तानका पूर्व अर्थमन्त्री मिफ्ताह इस्माइलले पाकिस्तान आर्थिक मोर्चामा जुन दिशामा अघि बढिरहेको छ त्यसका कारण देश विदेशी ऋण तिर्न नसक्ने घोषणा गर्ने (डिफल्ट हुने) जोखिममा रहेको बताएका छन् । उनले पाकिस्तानको वर्तमान सरकारलाई परिस्थितिसँग जुध्न रचनात्मक कदम चाल्न आग्रह गरेका छन्।

पाकिस्तानको जियो न्युजसँग कुरा गर्दै उनले भने, “पाकिस्तानले डिफल्ट गर्नु हुँदैन। तर मलाई लाग्छ हामी जुन बाटोमा छौं, हाम्रो अगाडि आर्थिक चुनौती छ र डिफल्ट हुने सम्भावना छ। यो खतराबाट बच्न हामीले कदम चाल्नुपर्छ। ।” उनले आईएमएफको नवौं समीक्षा नहुँदासम्म डिफल्टको जोखिम रहने बताए ।

पाँच महिनासम्म पाकिस्तानको अर्थमन्त्री रहेका इस्माइलका अनुसार पाकिस्तानको अवस्था निकै नाजुक छ र आईएमएफ नआएसम्म यो डर रहिरहनेछ । उनले भने कि पाकिस्तानको यो अवस्था विगतका सरकारहरूको कारणले भएको हो र यसलाई इमरान खानले डिफल्टको नजिक पुर्‍याइरहेका छन्।

उनले भने, “जब हामीले प्रधानमन्त्री शहबाज शरीफको नेतृत्वमा आईएमएफ कार्यक्रमलाई ट्र्याकमा ल्याउन चाहन्थ्यौं, खानले उनीसँग गरेको वाचा तोडेका थिए।” स्टेट बैंक अफ पाकिस्तान (एसबीपी) ले सुकुक बन्डमा १ अर्ब डलरको प्रतिबद्धता गरेपछि पाकिस्तानले यस महिनाको सुरुमा डिफल्ट हुनबाट बचेको थियो।

तर त्यसयता विदेशी मुद्रा सञ्चिति डिसेम्बर २ सम्म १०.४५ प्रतिशतले घटेर ६,७१४.९ मिलियन डलरमा पुगेको छ, जुन चार वर्षमा सबैभन्दा कम हो। चालू आर्थिक वर्षको पहिलो त्रैमासिकमा वित्तीय घाटा कुल गार्हस्थ्य उत्पादनको १ प्रतिशत पुगेको छ भने आईएमएफसँगको सहमतिअनुसार ०.७ प्रतिशत हुनुपर्ने थियो । तर, जियो न्यूजका अनुसार वित्त तथा राजस्व मन्त्री इशाक दारले पाकिस्तान सही दिशामा अघि बढेकोले डिफल्ट नहुने बताए ।