काठमाडौं। क्यानडाको टोरन्टो शहरका केही भागमा तीन ठूला आँधीका कारण अत्यधिक वर्षापछि आएको बाढीले मुख्य सडकहरु जलमग्न भएका छन्। ती सडकबाट यात्रा गरिरहेका कयौं यात्रु तथा चालकहरु फसेका छन्।

अत्यधिक वर्षा र बाढीका कारण प्रभावित क्षेत्रमा विद्युत सेवा अवरुद्ध भएको छ। पर्यावरण क्यानडाको रिपोर्ट अनुसार हिजो टोरन्टोमा १ सय मिलिमिटर वर्षा भएको छ।

हिजोको वर्षाले सन् १९४१ पछिको वर्षाको दैनिक रेकर्ड तोडिएको छ। सार्वजनिक भएका भिडियो तथा तस्वीरहरुमा शहरभरी ठूलो बाढी पसेको देखिन्छ । साथै सडकमा कारहरु डुबेका छन् । युनियन स्टेशनमा सिँढीहरु तल पानी झरेको देखिएको छ।

टोरन्टो हाइड्रोका अनुसार आँधीले १ लाख ६७ हजारभन्दा बढीलाई बिजुली बिहीन बनाएको छ। वर्षा र बाढीका कारण धेरै उडान रद्द र ढिलाइ भएका छन् । केही राजमार्गहरु बन्द गरिएका छन् । बाढीमा फसेका १४ जनाको उद्दार गरिएको अधिकारीहरुले बताएका छन्।