लिस्बन। बागलुङको अमलाचौरस्थित सरंगीमा रहेको लक्ष्मीनारायण आधारभूत विद्यालयमा अध्ययनरत बालबालिकालाई शैक्षिक सामग्री तथा पोसाक वितरण गरिएको छ।

अन्तर्राष्ट्रिय बागलुङ समाजको सहयोगमा उक्त विद्यालयमा अध्यनरत बालबालिकालाई शैक्षिक सामग्री तथा पोसाक वितरण गरिएको हो। समाजका उपाध्यक्ष भीम केसीले जिल्लास्थित विद्यालय पुगेर एक कार्यक्रमका बीच बालबालिकालाई शैक्षिक सामग्री तथा पोसाक वितरण गरेको संस्थाले जनाएको छ।

विद्यालयमा अध्यनरत गरिब, जेहेन्दार तथा पिछडिएका माझी समुदायका ४५ जना बालबालिकालाई झोला, कापीकलम, जुत्ता, पोसाकलगायतका सामग्री सहयोग स्वरुप प्रदान गरिएको समाजका उपाध्यक्ष केसीले बताए।

माझी समुदायका बालबालिकाको पठनपाठनमा थोरै भएपनि सहयोग पूगोस् भन्ने उद्देश्यले समाजले करिब १ लाख ५० हजार रुपैयाँ बराबरको शैक्षिक सामग्री प्रदान गरेको उनले बताए।