काठमाडौं। नेपाल प्रिमियर लिग (एनपिएल) अन्तर्गतको एलिमिनेटर खेलमा कर्णाली याक्सले चितवन राइनोजलाई एक सय ७६ रनको लक्ष्य दिएको छ। त्रिवि क्रिकेट मैदानमा टस हारेर पहिले ब्याटिङ गरेको कर्णालीले निर्धारित २० ओभरमा ६ विकेट गुमाएर एक सय ७५ रन बनाएको हो।

कर्णालीका लागि ब्याटिङतर्फ जयकिसन कोल्सावाला र विलियम बोसिस्टोले अर्धशतकीय पारी खेले। कोल्सावालाले ३९ बलमा छ चौका र दुई छक्काको मद्दतमा ५३ रनमा आउट भए भने समान ३९ बल खेलेका बोसिस्टोले तीन चौका र दुई छक्का प्रहार गरी ५२ रन बनाए। यस्तै चाडविक वाल्टनले २३ बलमा चार चौका र तीन छक्काको मद्दतमा ४६ तथा जिसन मक्सुदले १४ रन बनाए।

यता, बलिङतर्फ चितवनका लागि सोहेल तनबिरले दुई विकेट लिए। यस्तै शरद भेषावकर, कप्तान कुशल मल्ल, र रबि बोपाराले समान एक एक विकेट लिए।

यस खेलको विजेताले दोस्रो क्वालिफायर खेल्नेछ भने पराजित हुने टोली प्रतियोगिताबाट बाहिरिने छ।