काठमाडौं । उपप्रधान तथा अर्थमन्त्री विष्णु पौडेलले सरकार परिवर्तन हुन्छ भन्ने हावादारी कुराको प्रतिक्रिया दिन जरुरी नभएको बताएका छन्।

शनिबार बिराटनगर बिमानस्थलमा सञ्चारकर्मीसँग कुरा गर्दै उपप्रधानमन्त्री पौडेलले सरकार परिवर्तन हुन्छ भन्ने भ्रमपूर्ण र हावादारी कुरा भएको बताए।

अहिलेको कांग्रेस–एमालेबीचको सहकार्य २०८४ सम्म भएकाले ८४ पछिमात्रै सरकार परिवर्तन हुने उनले प्ररस्ट पारे। मन्त्री पौडेलले सुशासन, आर्थिक सुधार र संविधान संसोधनका लागि एमाले र कांग्रेसबीच गठबन्धन भएकाले कुशासन र भ्रष्टाचार नियन्त्रणका साथै कालोबजारी तथा तस्करी नियन्त्रणमा सरकार लागिपरेको बतारे।

त्यस्तै उनले नयाँ सरकार गठन भएपछि मुलुकको अर्थतन्त्र सुधार भएको दाबीसमेत गरे। गत वर्षभन्दा यस वर्षको पछिल्लो ६ महिनामा आर्थिक सूचक सकारात्मक देखिएकाले अर्थतन्त्र चलायमान हुने उनको भनाइ छ।

पौडेलले अर्थतन्त्रमा सुधार आउने क्रम बढेकाले चालू आर्थिक वर्षको अन्त्य सम्ममा पूँजीगत खर्च बढ्ने जिकिर गरे।