काठमाडौं । इस्तानबुलका मेयर एकराम इमामोग्लुको गिरफ्तारीपछि टर्कीमा विरोध प्रदर्शन जारी छ। टर्कीका राष्ट्रपति रेसेप तैयप एर्दोगानका प्रतिद्वन्द्वी एकराम इमामोग्लुलाई बुधबार पक्राउ गरिएको छ।

यो कारबाही इमामोग्लुलाई २०२८ को राष्ट्रपति पदको उम्मेदवारको रूपमा छनोट हुनुभन्दा केही दिन अघि गरिएको थियो।

यसपछि, इमामोग्लुका समर्थकहरू सडकमा उत्रिए। बिहीबारदेखि प्रहरी र प्रदर्शनकारीबीच झडप भइरहेको छ।

टर्कीका अधिकारीहरूले प्रदर्शनको तेस्रो दिन शुक्रबार राति देशभर ३४३ जनालाई पक्राउ गरिएको बताएका छन्।

इमामोग्लु शनिबार इस्तानबुल अदालतमा उपस्थित भए र अभियोजकहरूले आतंकवाद र भ्रष्टाचारको आरोपमा उनलाई औपचारिक गिरफ्तारीको लागि अपील गरे।

इमामोग्लुले आफूमाथि लगाइएका आरोपहरूलाई अस्वीकार गरेका छन्।

आफ्नो भाषणमा एर्दोगानले बढ्दो विरोध प्रदर्शनको निन्दा गरेका छन्। उनले इमामोग्लुको विपक्षी रिपब्लिकन पिपुल्स पार्टीलाई ‘शान्ति खलबल्याउने र जनतालाई ध्रुवीकरण गर्ने’ प्रयास गरेको आरोप लगाए।