काठमाडौं । अमेरिकी राष्ट्रपति डोनाल्ड ट्रम्पले गाजा पट्टीको बारेमा छलफल गर्न अरब र इस्लामिक देशका नेताहरूसँग भेट गरेका छन्। ह्वाइट हाउसले बैठकको भिडियो साझा गरेको छ ।

यसमा ट्रम्पले सबै नेताहरूलाई सम्बोधन गरिरहेको देखिन्छ। उनी भन्छन्, “यो बैठक धेरै महत्त्वपूर्ण छ। हामी गाजामा युद्ध अन्त्य गर्न चाहन्छौं। सायद हामी यसलाई अहिले नै अन्त्य गर्न सक्छौं।”

उनले भने, “हामी यहाँ बन्धकहरूलाई फिर्ता ल्याउन र युद्ध रोक्न सक्छौं कि सक्दैनौं भन्ने बारेमा छलफल गर्न आएका हौं।”

पाकिस्तानको प्रधानमन्त्री कार्यालयले पनि बैठकको बारेमा जानकारी साझा गरेको छ। “प्रधानमन्त्री शाहबाज शरीफले अमेरिकी राष्ट्रपति डोनाल्ड ट्रम्प र कतारका अमिर शेख तमिम बिन हमद अल-थानीले न्यूयोर्कमा आयोजना गरेको अरब-इस्लामिक नेताहरूको बैठकमा भाग लिए ,” पीएमओले भन्यो।

यस भेटपछि शाहबाज शरीफ र ट्रम्पबीच अनौपचारिक कुराकानी पनि भयो। यसको भिडियो पाकिस्तानी विदेश मन्त्रालयले जारी गरेको छ।

पाकिस्तानको विदेश मन्त्रालयका अनुसार ट्रम्पसँगको बैठकमा आठ अरब र इस्लामिक देशका नेताहरू उपस्थित थिए।