कर्णाली। निर्वाचन आयोगले कर्णाली प्रदेशका हिमाली जिल्लामा मतपत्र पठाउने तयारी भइरहेको जनाएको छ। निर्वाचन आयोगका सचिव कृष्णबहादुर राउतले कर्णाली प्रदेशका हिमाली जिल्लामा छिट्टै मतपत्र पठाउने बताएका हुन्।

प्रदेश निर्वाचन सुरक्षा समितिको जिल्ला प्रशासन कार्यालय सुर्खेत वीरेन्द्रनगरमा बसेको बैठकमा सचिव राउतले विशिष्ट अवस्थामा हुन लागेको निर्वाचन सम्पन्न गर्न निर्वाचन आयोगले कुनै कसर बाँकी नराख्ने बताए।

उनका अनुसार निर्वाचन सामग्रीसहित मतदान केन्द्रमा खटिने कर्मचारीको भत्ता, ढुवानी र हेलिकोप्टरको खर्च पठाइ सकिएको छ। आवश्यकतामा आयोगले थप काम गर्दै जाने उनले बताए।

फागुन १० गतेदेखि मसान्तसम्मको मौसम अनुमान गरेर पठाउन जल तथा मौसम विज्ञान विभागलाई अनुरोध गरिएको भन्दै उनले उच्च हिमाली जिल्लाको निर्वाचनका लागि हुम्ला, मुगु र डोल्पामा फागुन ९, १० र ११ गतेभित्र मतपत्र पठाउने तयारी भइरहेको उनले जानकारी दिए।

तीन हजार मिटरभन्दा माथि जिल्लामा लेक लाग्ने अवस्थालाई मध्य नजर गरेर औषधि खरिदका लागि सम्बन्धित जिल्ला निर्वाचन कार्यालयमा बजेट पठाइएको सचिव राउतको भनाइ थियो।

कर्णाली प्रदेशका हिमाली जिल्लामा निर्वाचन पूर्व र निर्वाचन पश्चात् मतदान केन्द्रमा खटाइने कर्मचारीको आउने जाने व्यवस्थाको सुनिश्चित गर्न बैठकमा सुरक्षा प्रमुखहरुले अनुरोध गरेका थिए। त्यसैगरी निर्वाचनमा खटिएका कर्मचारीलाई आफ्नो मताधिकार प्रयोग गर्ने अवसर आयोगले दिनुपर्नेमा जोड दिइएको थियो।

बैठकमा प्रदेश कमाण्ड पोष्टका संयोजक कर्णाली प्रदेश सरकारका निमित्त सचिव लक्ष्मीकुमार विक, जिल्ला कमाण्ड पोष्टका अध्यक्ष सुर्खेत जिल्लाका प्रमुख जिल्ला अधिकारी जगदिश्वर उपाध्यायले निर्वाचन तयारीको अवस्था, सुरक्षाका चुनौती र समस्याका बारेमा प्रस्तुती दिएका थिए।

सुर्खेत जिल्ला क्षेत्र–२ का मुख्य निर्वाचन अधिकृत दीपक ढकाल, उत्तरपश्चिम पृतना सुर्खेतका बाहिनीपति सहायक रथी सञ्जय रञ्जितलगायत सुरक्षा निकायका प्रमुखहरुले निर्वाचनलाई केन्द्रित गरेर सुरक्षा व्यवस्थालाई मजबुत बनाइएको बताए।

आसन्न प्रतिनिधिसभा निर्वाचनमा कर्णाली प्रदेशमा १२ निर्वाचन क्षेत्र, दश लाख २४ हजार ६०६ मतदाता, ९५९ मतदानस्थल र एक हजार ४३८ मतदान केन्द्र रहेका छन्। रासस