काठमाडौं । बेलायतको वेल्स राज्यको कार्डिफस्थित एक अदालतले आफ्नी पत्नीलाई कार पार्कमा घातक रूपमा छुरा प्रहार गरी हत्या गर्ने ३७ वर्षीय पुरुषलाई आजीवन कारावास सजाय सुनाएको छ।

निवुनहेल्लगे दोना निरोधा कलपनी निवुनहेल्ला (३२) को सन् २०२५ अगस्ट २१ मा रिभरसाइडको साउथ मोर्गन प्लेसमा घटनास्थलमै मृत्यु भएको थियो। उनलाई निरोधा भनेर चिनिन्थ्यो । उनको हत्या गरेको आरोपमा पेण्टविनका थिसारा वेरेगलगेलाई पक्राउ गरिएको थियो । उनी निरोधाका पूर्वपति हुन् ।

वेरेगलगेले सुरुमा हत्या अस्वीकार गरे पनि गत जनवरीमा न्यूपोर्ट क्राउन कोर्टमा उनले दोष स्वीकार गरेका थिए। कार्डिफ क्राउन कोर्टका न्यायाधीश ड्यानियल विलियम्सले सजाय सुनाउँदै भने, “उनको निर्दयी स्वार्थले निरोधाको जीवन छोट्यायो।”

अदालतलाई दिइएको जानकारी अनुसार दम्पती महिनौँदेखि अलग बसिरहेका थिए। तर घटनाको बिहान वेरेगलगेले निरोधा त्यहाँ हुने थाहा पाएर आवासीय कार पार्कमा पुगेका थिए।

उनले १५ सेन्टिमिटरको भान्साको छुराले अनुहार, घाँटी, छाती, हात र खुट्टामा गम्भीर चोट पुर्‍याएका थिए। निरोधा दुई कारबीच घटनास्थलमै मृत अवस्थामा भेटिएकी थिइन्।

आक्रमण यति हिंस्रक थियो कि प्रयोग गरिएको छुराको ह्याण्डल समेत भाँचिएको थियो। प्रत्यक्षदर्शीहरूले वेरेगलगेलाई आफ्नो फोर्ड फिएस्टा कारमा तीव्र गतिमा भाग्दै गरेको देखेका थिए। केही समयपछि उनलाई कार्डिफको ट्रेमोर्फा क्षेत्रमा एक ट्रक चालकले अस्वस्थ अवस्थामा देखेका थिए।

पुलिसले उनलाई पक्राउ गर्दा कारभित्र रगतले भिजेका ग्लोभ र खोलिएको छुराको प्याक भेटिएको थियो। अनुसन्धानका क्रममा उनले पत्नी “भागेकी” र “अर्कासँग बस्न थालेकी” दाबी गरेका थिए।

निरोधा र वेरेगलगेले सन् २०१७ मा श्रीलङ्कामा विवाह गरेका थिए। उनीहरू सन् २०२२ मा कार्डिफ आएका थिए। तर वैवाहिक जीवनमा समस्या बढ्दै गएपछि निरोधाले कार्यस्थलका सहकर्मी जेम्स स्टेफेन्सनसँग सम्बन्ध गाँसेकी थिइन्।

प्रहरीको भनाइअनुसार हत्या योजनाबद्ध र पूर्वनियोजित थियो। अभियोजन पक्षले आक्रमण अत्यन्त हिंस्रक भएको र छुरा समेत भाँचिएको तथ्य प्रस्तुत गरेको थियो।

रक्षापक्षका वकिल एन्ड्र्यु टेलरले यो घटनालाई “दुई प्रतिभाशाली र महत्वाकांक्षी व्यक्तिहरूबीचको दुःखद घटना” भनेका थिए।

न्यायाधीश विलियम्सले निरोधाको जीवन “निर्दयी स्वार्थले” समाप्त भएको उल्लेख गर्दै उनले “लामो र सुखी जीवन पाउनुपर्ने” बताए।

दक्षिण वेल्स प्रहरीले निरोधालाई परिवार र साथीहरूले अत्यन्तै माया गर्ने व्यक्तिका रूपमा वर्णन गर्दै उनको जीवन “ईर्ष्यालु र कायर पूर्वसाथीले” अन्त्य गरेको बताएका छन्।