वासिङ्टन। इरानसँगको बढ्दो सैन्य तनाव र जारी युद्धको विरोधमा उत्रिएका दर्जनौँ पूर्व अमेरिकी सैनिक र उनका परिवारका सदस्यहरूलाई प्रहरीले अमेरिकी संसद भवन (क्यापिटल हिल) बाट पक्राउ गरेको छ।

सोमबार वासिङ्टनस्थित ‘क्यानन हाउस अफिस बिल्डिङ’ को रोटुन्डा (केन्द्रीय कक्ष) मा युद्धविरोधी प्रदर्शन गरिरहेका करिब ६० जना प्रदर्शनकारीलाई अमेरिकी क्यापिटल प्रहरीले नियन्त्रणमा लिएको हो।

‘अबाउट फेस: भेट्रान्स अगेन्स्ट द वार’ लगायतका विभिन्न सैनिक विरोधी समूहको अगुवाइमा भएको उक्त प्रदर्शनमा सहभागीहरूले इरानविरुद्धको अमेरिकी सैन्य कारबाही तत्काल रोक्न माग गरेका थिए।

युद्धमा सहभागी भइसकेका कतिपय अशक्त पूर्व सैनिकहरूले सैनिक पोसाकमै उपस्थित भएर युद्धको विभीषिकाबारे विरोध जनाएका थिए। उनीहरूले ‘इरानमाथिको युद्ध अन्त्य गर’, ‘हामीलाई अर्को युद्ध स्वीकार्य छैन’ लेखिएका ब्यानरहरू प्रदर्शन गरेका थिए।

प्रदर्शनका क्रममा उनीहरूले युद्धमा मारिएका र भविष्यमा मारिन सक्ने सैनिकहरूको सम्झनामा प्रतीकात्मक रूपमा झण्डा ओढाउने (Flag-folding) कार्यक्रमसमेत आयोजना गरेका थिए। साथै, इरानमा मारिएका नागरिकहरूको सम्मानमा उनीहरूले रातो ट्युलिप फूलहरू बोकेका थिए।

पक्राउ पर्नुअघि प्रदर्शनमा सहभागी माइक प्रिसनरले भनेका छन्, “यो युद्ध अमेरिकामा निकै अलोकप्रिय छ र यो ट्रम्प प्रशासनका लागि एउटा ठूलो संकट हो।” उनले थप सैनिकहरूले पनि युद्धविरुद्ध आवाज उठाउन थालेको र यो ‘युद्ध मेसिन’ लाई रोक्न आफूहरू प्रतिबद्ध रहेको बताए।

गत फेब्रुअरी २८ देखि सुरु भएको इरानविरुद्धको युद्धका कारण अमेरिकाभित्रै चर्को आलोचना र विरोधका कार्यक्रमहरू भइरहेका छन्। पछिल्लो समय युद्धका कारण अमेरिकी बजेट र जनधनमा परेको असरलाई लिएर जनस्तरबाट समेत सरकारको आलोचना बढेको छ।

प्रदर्शनकारीहरूले संसद भवनभित्रै गरेको यो शान्तिपूर्ण नागरिक अवज्ञाको कार्यलाई सुरक्षा निकायले कानुन विपरीत भन्दै हस्तक्षेप गरेपछि उनीहरूलाई पक्राउ गरिएको हो।

यो घटनाले अमेरिकामा इरान युद्धलाई लिएर बढ्दो आन्तरिक असन्तुष्टि र ट्रम्प प्रशासनमाथि परेको चौतर्फी दबाबलाई थप उजागर गरेको छ। अहिले पक्राउ परेका प्रदर्शनकारीहरूको रिहाइ र युद्धको विरोधमा भइरहेका यस्ता गतिविधिहरूले आगामी दिनमा अमेरिकी राजनीतिमा कस्तो प्रभाव पार्छ, त्यो चासोको विषय बनेको छ।