काठमाडौं। नेपालको फेसन, मोडलिङ तथा सञ्चार क्षेत्रका प्रतिष्ठित व्यक्तित्व रोजिन शाक्य अन्तर्राष्ट्रिय संस्था ‘वर्ल्ड बुक अफ रेकर्ड्स लन्डन’ बाट सम्मानित भएका छन्।

दुई दशकभन्दा लामो समयदेखि नेपाली फेसन र प्याजेन्ट्री क्षेत्रमा पुर्‍याएको अतुलनीय योगदानको उच्च मूल्यांकन गर्दै उनलाई ‘सर्टिफिकेट अफ एक्सिलेन्स’ प्रदान गरिएको हो।

अप्रिल ३०, २०२६ मा काठमाडौंमा आयोजित २०औं अन्तर्राष्ट्रिय समिट तथा अवार्ड समारोहका बीच उहाँलाई यो विशेष सम्मान अर्पण गरिएको हो। मञ्चीय अभिव्यक्ति र प्रस्तुतिको कलालाई प्रभावकारी रूपमा संयोजन गर्ने उनको विशिष्ट क्षमतालाई सम्मानको मुख्य आधार बनाइएको छ।

बहुआयामिक व्यक्तित्वका धनी शाक्य कोरियोग्राफी, कार्यक्रम सञ्चालन, पत्रकारिता, शिक्षण र मिडिया क्षेत्रमा उत्तिकै सक्रिय छन्। उनले हालसम्म करिब १,४०० कार्यक्रमहरूको कोरियोग्राफी तथा समन्वय गरिसकेका छन्, जसमा ३०० भन्दा बढी फेसन शो र थुप्रै सौन्दर्य प्रतियोगिताहरू समावेश छन्।

नेपालका स्थानीय मञ्चदेखि अन्तर्राष्ट्रिय स्तरका मिस मरमेड सिङ्गापुर, हेरिटेज प्याजेन्ट्स र मिस तामाङ वर्ल्ड जस्ता प्रतियोगिताहरूमा उनको विशेषज्ञताले नेपाली कला र प्रतिभालाई विश्वस्तरमा चिनाउन महत्वपूर्ण भूमिका निर्वाह गरेको छ। उनको कार्यशैलीले नेपालको फेसन र प्याजेन्ट संस्कृतिलाई व्यावसायिक र अन्तर्राष्ट्रिय स्तरमा स्थापित गर्न ठुलो मद्दत पुगेको छ।

विगत २४ वर्षदेखि सञ्चार क्षेत्रमा आबद्ध शाक्य पछिल्लो १७ वर्षदेखि इमेज च्यानल टेलिभिजनमा नेपाल भाषाको समाचार वाचक तथा संयोजकका रूपमा कार्यरत छन्। सन् १९९८ देखि नै कार्यक्रम सञ्चालन (एम्सी) सुरु गरेका उनले हालसम्म १,७०० भन्दा बढी राष्ट्रिय तथा अन्तर्राष्ट्रिय कार्यक्रमहरू सफलतापूर्वक सञ्चालन गरिसकेका छन्।

स्पष्ट र ओझपूर्ण बोलीका कारण उनी नेपालका सबैभन्दा रुचाइएका र प्रतिष्ठित कार्यक्रम सञ्चालकमध्ये एक मानिन्छन्। साथै, उनले नमुना कलेज अफ फेसन टेक्नोलोजी लगायतका विभिन्न शैक्षिक संस्थाहरूमा फेसन पत्रकारिता र व्यक्तित्व विकासका विषयहरूमा अध्यापन गर्दै नयाँ पुस्तालाई व्यावसायिक मार्गदर्शन समेत दिँदै आएका छन्।

रोजिन शाक्यले यसअघि पनि ‘लेजन्डरी फेसन कोरियोग्राफर’, ‘मिस्टर भर्साटाइल अफ द इयर’ र ‘कोरियोग्राफर अफ द इयर’ जस्ता थुप्रै राष्ट्रिय तथा अन्तर्राष्ट्रिय अवार्डहरू प्राप्त गरिसकेका छन्।

उनी हाल ग्ल्यामर नेपाल र येसनेपाली डट कम जस्ता डिजिटल माध्यममा सम्पादकीय नेतृत्व गर्दै नेपाली कला र संस्कृतिको प्रवर्द्धनमा क्रियाशील छन्। वर्ल्ड बुक अफ रेकर्ड्सको यो पछिल्लो सम्मानले उनको निरन्तरको साधना, नेतृत्व क्षमता र व्यावसायिक उत्कृष्टतालाई अन्तर्राष्ट्रिय मञ्चमा पुनः एकपटक प्रमाणित गरिदिएको छ। उनको यो उपलब्धि नेपाली फेसन र मिडिया जगतका लागि गौरवको विषय बनेको छ।