काठमाडौं। करिब दुई दशकदेखि शास्त्रीय संगीत साधनामा क्रियाशील गायिका तेजवती जोशीको स्वरमा सजिएको नयाँ गीत ‘नेपालकी छोरी’ को भिडियो सार्वजनिक भएको छ।

देशप्रेम, अग्रजप्रतिको सम्मान र अनुजप्रतिको मायालाई मूल भाव बनाइएको यस गीतमा कुमार मिश्रको शब्द तथा टेकेन्द्र नेपालीको संगीत रहेको छ। गीतले समाजमा सकारात्मक सोचको सञ्चार गर्दै नेपाली छोरीको स्वाभिमान र पहिचानलाई सुन्दर ढंगले प्रस्तुत गरेको छ।

सार्वजनिक भिडियोमा चर्चित मोडल गीता ढुंगानाको मुख्य अभिनय देख्न सकिन्छ। दुई चुल्ठी बाटेको परम्परागत नेपाली अवतारमा प्रस्तुत भएकी गीताको अभिनय र उर्जा भिडियोमा निकै खुलेको छ।

योगेन्द्र राजकर्णीकारको निर्माण तथा जिबी आग्रीको निर्देशनमा तयार भएको यस भिडियोको संगीत संयोजन रिदम कँडेलले र मिक्सिङ तथा मास्टरिङ साजन शाहले गरेका हुन्। त्यस्तै थम्मन टाडीको कोरियोग्राफी, उत्सव दाहालको छायांकन र सिलन लम्सालको सम्पादन रहेको यो भिडियो ओसआर डिजिटलको आधिकारिक युट्युब च्यानलमार्फत बजारमा ल्याइएको हो।

गायिका तेजवती जोशी र संगीतकार टेकेन्द्र नेपालीबीचको यो पाँचौँ सहकार्य हो। यसअघि उनीहरूले ‘चुम्बक’ र ‘हजार जुनी’ सहित चारवटा सफल गीतहरूमा सँगै काम गरिसकेका छन्। लामो समयदेखि संगीतमा सक्रिय गायिका जोशीले यसअघि नेपालीका साथै नेवारी भाषाका गीतहरूमा समेत आफ्नो स्वर दिइसकेकी छिन्।