काठमाडौं । कर्पोरेट कार्यशैली र मानसिक स्वास्थ्यको विषयलाई लिएर यतिबेला सामाजिक सञ्जालमा एउटा नयाँ र चाखलाग्दो बहस सुरु भएको छ।

एकजना सफ्टवेयर इन्जिनियर (टेक प्रोफेसनल) ले वार्षिक ७२ लाख भारतीय रुपैयाँ (करिब १ करोड १५ लाख नेपाली रुपैयाँ) को आकर्षक पारिश्रमिकसहितको जागिरको प्रस्तावलाई ‘कार्य-जीवन सन्तुलन’ (वर्क-लाइफ ब्यालेन्स) र मानसिक शान्तिका लागि भन्दै अस्वीकार गरेपछि यस विषयले व्यापक चर्चा पाएको हो।

यो रकम नेपाली मुद्रामा र नेपालको मासिक पारिश्रमिक प्रणालीअनुसार मासिक १० लाख रूपैयाँको हाराहारीमा हुन आउँछ । पछिल्लो समय प्रविधि क्षेत्रका युवा पुस्तामा बढ्दो कार्यबोझ र पैसाभन्दा स्वास्थ्यलाई प्राथमिकता दिने प्रवृत्तिको उदाहरणका रूपमा यस घटनालाई हेरिएको छ।

सम्बन्धित प्राविधिकका अनुसार उक्त कम्पनीले प्रस्ताव गरेको पारिश्रमिक आकर्षक भए तापनि कामको सर्त र मागहरू अव्यावहारिक एवं अत्यधिक तनावपूर्ण थिए। कम्पनीले हप्तामा ६ दिन काम गर्नुपर्ने, निर्धारित समयभन्दा पछि पनि अबेर रात्रिसम्म उपलब्ध भइरहनुपर्ने र कार्यसमय अनिश्चित हुने सर्तहरू राखेको थियो।

आफ्नो व्यक्तिगत जीवन, पारिवारिक समय र स्वास्थ्यको तुलनामा सो मोटो रकम निकै न्यून महसुस भएकाले आफूले उक्त सम्झौता अस्वीकार गरेको ती इन्जिनियरले सामाजिक सञ्जालमा उल्लेख गरेका छन्। उनले आफ्नो मानसिक स्वास्थ्यलाई दाउमा राखेर गरिने कामको कुनै औचित्य नहुने तर्क समेत प्रस्तुत गरेका छन्।

यो घटना सार्वजनिक भएसँगै सामाजिक सञ्जाल प्लेटफर्म लिङ्क्डइन र एक्समा प्रयोगकर्ताहरू दुई धारमा विभाजित भएका छन्। कार्य-जीवन सन्तुलनका समर्थकहरूले युवा इन्जिनियरको कदमको स्वागत गर्दै पैसाभन्दा जीवनको गुणस्तर र स्वास्थ्य महत्त्वपूर्ण हुने धारणा राखेका छन् भने यसअघि स्थापित उद्योगीहरूले अघि सारेको हप्तामा ७० घण्टा काम गर्नुपर्ने अवधारणाको आलोचना गरेका छन्।

अर्कोतर्फ, केही पुराना र अनुभवी प्रबन्धकहरूले भने करियरको सुरुवाती वा महत्त्वपूर्ण वर्षहरूमा यति ठूलो आर्थिक अवसर गुमाउनु बुद्धिमानी नहुने तर्क गरेका छन्। केही वर्ष कडा मिहिनेत गरेर आर्थिक स्वतन्त्रता हासिल गरेपछि मात्र सन्तुलित जीवनतर्फ लाग्नु व्यावहारिक हुने उनीहरूको भनाइ छ। समग्रमा, यस घटनाले आधुनिक श्रम बजारमा रोजगारदाता र कर्मचारीको प्राथमिकता परिवर्तन हुँदै गइरहेको प्रष्ट पारेको छ।