काठमाडौं। नेपाल टेलिकमको एसएमएस सेवाको दुरुपयोग गरी कनेक्ट आईपीएसलगायत विभिन्न बैंक तथा डिजिटल भुक्तानी सेवा प्रदायकहरूको नाममा ग्राहकहरूलाई भ्रामक र शंकास्पद सन्देशहरू पठाउने गतिविधि बढेको पाइएकाले सचेत रहन नेपाल टेलिकमले विशेष अनुरोध गरेको छ।

पछिल्लो समय डिजिटल वित्तीय कारोबारमा सर्वसाधारणको पहुँच बढेसँगै अपराधीहरूले टेलिकमको नेटवर्क प्रयोग गरेर ग्राहकहरूलाई ठगी गर्ने नयाँ शैली अपनाएका हुन्।

यस्ता नक्कली र भ्रमपूर्ण सन्देशहरूमा ग्राहकको बैंक खाता वा डिजिटल वालेट निलम्बन भएको, अस्थायी रूपमा बन्द भएको वा सुरक्षा सम्बन्धी अन्य गम्भीर समस्या देखिएको भन्दै डर र त्रास फैलाउने गरिएको छ। त्यसपछि समस्या समाधानका नाममा ग्राहकहरूलाई सन्देशमै एउटा शंकास्पद वेबसाइट वा लिंक उपलब्ध गराएर त्यसमा प्रवेश गर्न र आफ्ना संवेदनशील विवरणहरू प्रविष्ट गर्न प्रेरित गर्ने गरेको पाइएको छ।

यस्ता प्रकृतिका ठगीजन्य क्रियाकलापबाट आफ्ना ग्राहकहरूलाई जोगाउन नेपाल टेलिकमले आधिकारिक विज्ञप्ति जारी गर्दै अपरिचित वा शंकास्पद लिंक, फोन कल तथा एसएमएसहरूप्रति सधैँ सजग र सचेत रहन आग्रह गरेको छ।

कुनै पनि प्रलोभन वा डर देखाएर पठाइएका लिंकहरू प्रयोग गर्नु भन्दा अगाडि सम्बन्धित बैंक, वित्तीय संस्था वा भुक्तानी सेवा प्रदायकको आधिकारिक वेबसाइट वा मोबाइल एप्लिकेसनमार्फत जानकारीको सत्यतथ्य प्रमाणित गर्न कम्पनीले सबैलाई अनुरोध गरेको छ।

डिजिटल कारोबारलाई सुरक्षित राख्नका लागि आफ्नो मोबाइलमा आउने वान टाइम पासवर्ड अर्थात् ओटिपी, अकाउन्टको पासवर्ड, कन्ट्याक्ट पिन तथा डेबिट वा क्रेडिट कार्डको पछाडि रहने सिभिभी नम्बर जस्ता अत्यन्तै गोप्य विवरणहरू भुलेर पनि कसैसँग साझा नगर्न टेलिकमले कडा सुझाव दिएको छ।

कम्पनीका अनुसार ग्राहकहरूको डिजिटल र वित्तीय सुरक्षा नै उसको प्रमुख प्राथमिकता भएकाले यस्ता भ्रामक र गैरकानुनी गतिविधिबाट सुरक्षित रहन सम्पूर्ण उपभोक्ताहरू सधैँ चनाखो हुनुपर्ने देखिन्छ।

यदि कसैलाई कुनै पनि प्रकारको शंकास्पद एसएमएस, अपरिचित नम्बरबाट फोन कल वा शंकास्पद वेब लिंक प्राप्त भएमा वा झुक्किएर त्यस्ता लिंकमा क्लिक हुन पुगेमा, ढिला नगरी तुरुन्तै सम्बन्धित वित्तीय संस्था वा नेपाल प्रहरीको साइबर ब्यूरोमा तत्काल जानकारी गराउन समेत नेपाल टेलिकमले सम्पूर्ण ग्राहकहरूमा हार्दिक अपिल गरेको छ।