चितवन। चितवनको भरतपुरमा जारी राष्ट्रिय स्वतन्त्र पार्टी (रास्वपा) को पहिलो राष्ट्रिय महाधिवेशनमा पदाधिकारी चयनको प्रक्रिया अन्तिम चरणमा पुग्दै गर्दा नयाँ सांगठनिक विवाद र दाउपेच सतहमा आएको छ।

पार्टी सभापति रवि लामिछाने र नेतृत्व तहले महाधिवेशनलाई गुटबन्दीरहित, स्वच्छ र सहमतिका आधारमा अगाडि बढाउन दिएको निर्देशन विपरीत महामन्त्री पदमा तीव्र आन्तरिक ध्रुवीकरण र गुटबन्दी सुरु भएको छ।

महाधिवेशनस्थलमा आयोजित पत्रकार सम्मेलनमार्फत महामन्त्री पदमा दाबेदारी प्रस्तुत गरेका पाँच जना प्रभावशाली नेताहरू गणेश पराजुली, निवर्तमान महामन्त्री कवीन्द्र बुर्लाकोटी, पूर्वमन्त्री शिशिर खनाल, प्रमोद न्यौपाने र जगदीश खरेलले सामूहिक रूपमा आफ्नो मनोनयन फिर्ता लिँदै सह-महामन्त्री विपीन आचार्यलाई समर्थन गर्ने घोषणा गरेका छन्।

नेता पराजुलीले पार्टीको बृहत्तर हित, आन्तरिक एकता र नेतृत्व तहमा सहजताका लागि आफूहरूले दाबी छोडेर आचार्यलाई साझा उम्मेदवारका रूपमा अगाडि बढाउने विवेकपूर्ण निर्णय लिएको दाबी गरे पनि महाधिवेशन प्रतिनिधिहरूले यसलाई शीर्ष नेताको निर्देशन विपरीत भित्री रूपमा प्यानल नै खडा गरेर गरिएको संस्थागत गुटबन्दी र घेराबन्दीका रूपमा बुझेका छन्।

पार्टीको माथिल्लो तहले चुनावभन्दा पनि आपसी समझदारी र विधिको शासनलाई प्राथमिकता दिँदै पदाधिकारी चयनलाई सकभर सहमतिको माध्यमबाट टुङ्ग्याउन निरन्तर आन्तरिक कसरत र छलफल गरिरहेको पृष्ठभूमिमा यो उम्मेदवारी फिर्ताको शृङ्खला आएको हो।

राजनीतिक वृत्तमा निकै अर्थपूर्ण रूपमा हेरिएको यस नयाँ ध्रुवीकरणले रास्वपाका संस्थापक नेता एवं वाचापत्र (घोषणापत्र) तयारीदेखि दलको नीति निर्माणमा मुख्य भूमिका खेल्दै आएका इन्जिनियर विपीन आचार्यको पक्षमा बलियो माहौल त सिर्जना गरिदिएको छ।

तर अर्कोतर्फ निवर्तमान महामन्त्री बुर्लाकोटीसहितको समूहले सांगठनिक पकड बलियो बनाउन र आफ्नो अनुकूलको नेतृत्व स्थापित गर्न शीर्ष नेतृत्वको मार्गनिर्देशन विपरीत समूहगत सक्रियता देखाएको भन्दै हलभित्र तीव्र असन्तुष्टि बढेको छ।

पाँच जना आकांक्षीहरू नाटकीय रूपमा पछि हटेसँगै अब महामन्त्रीको चुनावी मैदानमा विपीन आचार्यसहित राजुनाथ पाण्डे, रञ्जु दर्शना, गणेश कार्की र सागर ढकाल गरी पाँच जना मात्र बाँकी रहेका छन्, जसका कारण प्रतिस्पर्धा निकै रोचक र बहुकोणीय हुने निश्चित देखिएको छ।

विशेष गरी पार्टीको माथिल्लो तहले चुनावभन्दा पनि आपसी समझदारी र विधिको शासनलाई प्राथमिकता दिन बारम्बार आग्रह गरिरहेको पृष्ठभूमिमा, महामन्त्रीका उम्मेदवारहरूले गुटगत भेला र आन्तरिक समीकरण बनाउन लागेपछि यो स्थिति सिर्जना भएको बुझिएको छ।

निवर्तमान महामन्त्री बुर्लाकोटीले सांगठनिक पकड बलियो बनाउन र आफ्नो अनुकूलको नेतृत्व ल्याउन संस्थापन इतरका आकांक्षीहरूलाई समेटेर छुट्टै रणनीति बनाएको आरोप लागेको छ। शीर्ष दुई नेताको स्पष्ट मार्गनिर्देशनविपरीत भएको यस्तो समूहगत सक्रियताले रास्वपाले अंगाल्ने भनेको ‘उम्मेदवारपिच्छेको स्वतन्त्र प्रतिस्पर्धा’ को नारामाथि नै प्रश्न उठाएको छ।

यस किसिमको गुटबन्दीले बन्दसत्रको वातावरणलाई केही तरंगित बनाए पनि निर्वाचन आयोगले भने आन्तरिक लोकतान्त्रिक प्रक्रियालाई पूर्णतः मर्यादित र विधानसम्मत ढंगले अगाडि बढाउने तयारी गरिरहेको छ।

उम्मेदवारहरूको मनोनयन फिर्ता र दाबी-विरोधको प्राविधिक कार्य सकिएलगत्तै अन्तिम नामावली प्रकाशन गरिने तयारी भइरहँदा, शीर्ष नेतृत्वको निर्देशनविपरीत देखिएको यो गुटबन्दीले निर्वाचनको परिणाम र भावी सांगठनिक स्वरूपमा कस्तो असर पार्छ भन्ने कुरालाई महाधिवेशन हलले निकै चासोका साथ हेरिरहेको छ।