काठमाडौं। ठूलो बजेटमा निर्माण भएको बहुप्रतीक्षित पौराणिक ड्रामा फिल्म ‘नागबन्धम’ नेपालमा प्रदर्शनमा आएको छ। क्यापिटल वर्ल्डमार्फत नेपाल भित्रिएको तथा दर्शकलाई ‘लार्जर-द्यान-लाइफ’ (भव्य र जीवन्त) अनुभव दिने यो फिल्म शनिबार बेलुकाको शोदेखि देशभरका सिनेमा हलहरूमा प्रदर्शन भइरहेको छ।

फिल्ममा हिमालयको रहस्यमय गहिराइमा लुकेको भगवान् अनन्त पद्मनाभस्वामीको अमूल्य खजाना र श्रीरङ्गापुरम् मन्दिरमा रहेको ऐतिहासिक ‘ब्रह्म कमल’ (सुनौलो फूल) को रहस्यमय संसारलाई भव्य रूपमा प्रस्तुत गरिएको छ।

अभिषेक नामाको लेखन तथा निर्देशन रहेको यस फिल्ममा मुख्य पात्र रुद्र (विराट कर्ण) लाई भगवान् महादेव (शिव) को शक्तिशाली र उग्र स्वरूपका रूपमा प्रस्तुत गरिएको छ। उनी आफ्नो समुदाय र धार्मिक सम्पदालाई दुष्ट शक्तिहरूबाट जोगाउन आफ्नो जीवन नै दाउमा लगाएर संघर्षरत देखिन्छन्।

फिल्ममा विराट कर्णसँगै मुख्य अभिनेत्रीका रूपमा नभा नतेश र ऐश्वर्या मेननले अभिनय गरेका छन्। साथै, फिल्ममा चर्चित कलाकारहरू महेश माञ्जरेकर, जगपति बाबु, मुरली शर्मा र ऋषभ साहनीको पनि महत्त्वपूर्ण भूमिका रहेको छ।

‘केजीएफ’ फिल्मको ‘गरुडा’ पात्रबाट विशेष चर्चामा आएका रामचन्द्र राजुले यस फिल्ममा खलनायकको सशक्त भूमिका निर्वाह गरेका छन्। एनआईके स्टुडियो र अभिषेक पिक्चर्सको ब्यानरमा किशोर अन्नपुरेड्डी र निशिता नागिरेड्डीले निर्माण गरेको यस फिल्मले पौराणिक कथालाई सामाजिक, राजनीतिक तथा साम्प्रदायिक विषयसँग जोडेर प्रस्तुत गरेको छ। निर्माण पक्षका अनुसार हिन्दु धर्मप्रति आस्था राख्ने दर्शकका लागि यो फिल्म विशेष आकर्षणको केन्द्र बनेको छ।

कस्तो छ फिल्म ?

निर्देशक अभिषेक नामाले ‘नागबन्धम’मा धर्म, आस्था र शक्तिको द्वन्द्वलाई केन्द्रमा राख्दै कथालाई अघि बढाएका छन्। फिल्मको सुरुआत मानिसको अमर बन्ने चाहना र निरंकुश शक्तिप्रतिको लोभबाट हुन्छ।

फिल्मका मुख्य खलपात्रद्वय अब्दाली र बैरागी ‘ब्रह्म कमल’ प्राप्त गरेर परम शक्ति हासिल गर्न खोजिरहेका हुन्छन्। उनीहरूका विरुद्ध रुद्रले उक्त पवित्र सम्पदाको रक्षा गर्न आफ्नो जीवन नै समर्पित गर्छन्। सन् १७५६ को फ्ल्यासब्याकमार्फत धार्मिक समुदायमाथि भएको हिंसाको ऐतिहासिक घटनाले रुद्रको संघर्षलाई थप अर्थपूर्ण र मर्मस्पर्शी बनाएको छ।

फिल्मले सुरुआतमै पौराणिक र धार्मिक पृष्ठभूमि प्रभावकारी रूपमा स्थापित गर्छ। कथा श्रीरङ्गापुरम् मन्दिर र त्यससँग जोडिएका रहस्यतर्फ अघि बढेपछि फिल्मले थप गति लिन्छ। त्यसपछि कथा एक्सन-एड्भेन्चर (साहसिक द्वन्द्व) तर्फ मोडिन्छ, जहाँ रुद्रले सर्प, चील र गोहीसँगको जोखिमपूर्ण संघर्ष गर्दै आफ्नो लक्ष्यतर्फ अघि बढेको देखाइन्छ।

फिल्ममा पार्वतीको परिवारसँग सम्बन्धित कथा र १८औँ शताब्दीको नरसंहारलाई भावनात्मक रूपमा प्रस्तुत गरिएको छ। यसको भिजुअल प्रस्तुति, भव्य सेट, उत्कृष्ट एक्सन दृश्य र पौराणिक वातावरण सिर्जना गर्न निर्माण टिमले गरेको कडा मेहनत पर्दामा स्पष्ट देखिन्छ। यही भव्य दृश्य सञ्चालन र प्रस्तुति नै ‘नागबन्धम’को सबैभन्दा बलियो पक्षका रूपमा उभिएको छ।