काठमाडौं। लगातारको वर्षासँगै देशका विभिन्न स्थानमा गएको बाढी र पहिरोका कारण नौ वटा प्रमुख राजमार्ग अवरुद्ध भएका छन्।

नेपाल प्रहरीका अनुसार विशेष गरी कोशी र बागमती प्रदेशका मुख्य सडक खण्डहरू पूर्ण तथा आंशिक रूपमा प्रभावित भएका छन्।

कोशी प्रदेशअन्तर्गत भोजपुर नगरपालिका-५ बोखिमस्थित मध्यपहाडी लोकमार्गमा बाढीका कारण एकतर्फी मात्र सवारी सञ्चालन भइरहेको छ। इलाम नगरपालिका-९ राजदुवाली र पाँचथरको याङवरक गाउँपालिका-१ खोबरे खोला क्षेत्रमा पहिरो जाँदा मेची राजमार्ग पूर्ण रूपमा ठप्प बनेको छ।

यस्तै, खोटाङको दिक्तेल रुपाकोट मझुवागढी नगरपालिका-६ माटेखोला क्षेत्रमा मध्यपहाडी लोकमार्गको दिक्तेल-भोजपुर सडकखण्ड पनि पहिरोकै कारण पूर्ण रूपमा बन्द भएको छ।

बागमती प्रदेशमा सम्भावित जोखिमलाई ध्यानमा राख्दै बिपी राजमार्ग सञ्चालनमा रोक लगाइएको छ भने काठमाडौं-हेटौंडा जोड्ने कान्ति लोकपथमा पनि अर्को सूचना नभएसम्मका लागि सवारी साधन सञ्चालन बन्द गरिएको छ। सिन्धुपाल्चोकको भोटेकोशी गाउँपालिका-४ जुरीखोला र कोदारी क्षेत्रमा अरनिको राजमार्ग पहिरोले पूर्ण रूपमा अवरुद्ध पारेको छ।

यसैगरी, रसुवाको गोसाइँकुण्ड गाउँपालिका-६ बोकेझुण्डास्थित पासाङल्हामु सडकखण्डमा एकतर्फी मात्र सवारी सञ्चालन भइरहेको छ। चितवनको इच्छाकामना गाउँपालिका-३ फिस्लिङमा पहिरो खस्दा पृथ्वी राजमार्ग पूर्ण रूपमा ठप्प भएको छ।

धादिङको बेनीघाट रोराङ गाउँपालिका-१० तिस्मारखानी क्षेत्रमा पृथ्वी लोकमार्ग एकतर्फी सञ्चालनमा रहे तापनि सोही खण्डको जवाङखोलास्थित सडक भने पूर्ण रूपमा बन्द रहेको छ।

नेपाल प्रहरीले वर्षा जारी रहेकाले बाढी र पहिरोको जोखिम अझै कायमै रहेको जनाएको छ। सम्भावित विपद् र यात्राको सास्तीबाट बच्नका लागि सम्बन्धित निकाय वा प्रहरीसँग सडकको पछिल्लो अवस्थाबारे जानकारी लिएर मात्रै यात्रा तय गर्न सर्वसाधारणमा अनुरोध गरिएको छ।