काठमाडौं । इजरायलले कब्जा गरिएको पश्चिम किनारको रणनीतिक रूपमा महत्त्वपूर्ण क्षेत्रमा करिब १,२०० नयाँ बस्ती (घरहरू) निर्माणका लागि टेन्डर आह्वान गर्ने योजना बनाएको छ।

उक्त निर्णयको अमेरिकाका केही प्रमुख सहयोगी राष्ट्रहरूले समेत कडा आलोचना गरेका छन्। बेलायत, फ्रान्स, जर्मनी, इटाली र क्यानडाले एक संयुक्त विज्ञप्ति जारी गर्दै इजरायलको यो निर्णय ‘अस्वीकार्य’ रहेको बताएका छन् र यस योजनालाई तुरुन्त फिर्ता लिन आग्रह गरेका छन्।

अन्तर्राष्ट्रिय कानुनअनुसार सम्पूर्ण इजरायली बस्तीहरूलाई अवैध मानिन्छ। अन्तर्राष्ट्रिय दबाबका कारण इजरायलले जेरुसेलमको पूर्वमा रहेको ‘इ१’ क्षेत्रमा निर्माण योजनाहरू विगत धेरै दशकदेखि रोकेर राखेको थियो।

विभिन्न देशहरू र प्यालेस्टिनीहरूले यदि यस क्षेत्रमा निर्माण कार्य अघि बढेमा यसले ‘दुई-राष्ट्र समाधान’ को आशामा ठूलो धक्का पुग्ने बताएका छन्। यस कदमले पश्चिम किनारलाई प्रभावकारी रूपमा दुई भागमा विभाजित गर्ने र पूर्वी जेरुसेलमलाई अलग थलग पार्ने उनीहरूको विश्वास छ।

‘पश्चिम किनार यतिबेला गम्भीर अस्थिरताबाट गुज्रिरहेको छ। नागरिकहरूविरुद्ध इजरायली हिंसा अभूतपूर्व स्तरमा पुगेको छ भने प्यालेस्टिनी अर्थतन्त्रमाथि कडा प्रतिबन्धहरू लगाइएका छन्। यस्तो समयमा आएको यो निर्णय अझ बढी चिन्ताजनक छ,’ युरोपेली देशहरू र क्यानडाले बिहीबार जारी गरेको संयुक्त विज्ञप्तिमा उल्लेख छ।