काठमाडौं।  रसुवाको ल्हेन्दे खोला हुँदै भोटेकोशी नदीमा आज बिहान पुनः भीषण बाढी आएपछि सुरक्षा निकाय तथा स्थानीय प्रशासनले नदी तटीय क्षेत्रका बासिन्दालाई उच्च सतर्कता अपनाउन आग्रह गरेका छन्।

बाढी र पहिरोको जोखिम तीव्र रूपमा बढेपछि प्रहरीले मुख्य राजमार्गहरूमा सवारी साधनको आवागमन पूर्ण रूपमा बन्द गराएको छ।चितवन प्रहरीका अनुसार पहिरोका कारण नारायणगढबाट मुग्लिङ हुँदै पोखरा तथा काठमाडौँतर्फ जाने-आउने सबै प्रकारका सवारी साधनहरूको आवतजावत अर्को सूचना नआएसम्मका लागि पूर्ण रूपमा रोकिएको छ।

मुख्य सडकखण्ड ठप्प हुँदा सयौँ सवारी साधन र यात्रुहरू बाटोमै अलपत्र परेका छन्।यसअघि गत भदौ १० गते चीन-नेपाल सीमाक्षेत्र नजिकै हिमनदी (ग्लेशियर) खसेर ल्हेन्दे खोला हुँदै भोटेकोशी र त्रिशूली नदीमा भीषण बाढी आएको थियो।

उक्त जलप्रलयले रसुवा, नुवाकोट, धादिङ लगायतका तटीय क्षेत्रमा ठूलो मानवीय तथा भौतिक क्षति पुर्‍याएको थियो। पुरानो क्षति र जोखिम पछि नसकिँदै पुनः बाढी र पहिरोको प्रकोप बढेपछि तटीय बस्तीहरूमा त्रास फैलिएको छ।

प्रशासनले जोखिमयुक्त क्षेत्रमा रहेका सर्वसाधारणलाई तत्काल सुरक्षित स्थानमा सर्न, सुरक्षा निकायको निर्देशन पालना गर्न र अत्यावश्यक बाहेकका यात्रा स्थगित गरी आफ्नो र परिवारको सुरक्षालाई पहिलो प्राथमिकता दिन विशेष अनुरोध गरेको छ।