काठमाडौं । अफगानिस्तानकी एक महिला साइकल चालकले जापानमा भइरहेको एसियाली खेलकुदमा रजत पदक जितेकी छन्। उनले खेलमा करिअर बनाउनका लागि कुनै समय पुरुषको भेष धारण गरेर तालिम लिएकी थिइन्।

फरिबा हासिमी २०२१ मा तालिबान सत्तामा फर्किएपछि आफ्नो देश छाडेर गएकी थिइन्। उनले यसअघि आक्रमणबाट जोगिन बाध्य भएर पुरुषको भेष बदलेर प्रशिक्षण लिएको बताएकी छन्। अफगानिस्तानमा महिलाहरूमाथि कडा प्रतिबन्धहरू रहेका छन्।

हासिमीले मंगलबार जापानको नागया नजिकै भएको रेसमा रजत पदक जितेकी हुन्। २३ वर्षकी हासिमी आइतबार भएको महिला व्यक्तिगत टाइम ट्रायलमा सातौँ स्थानमा रहेकी थिइन्।

उनले आफ्नो रजत पदकलाई ‘अत्यन्तै खास’ भनेकी छन्। उनलाई आशा छ – उनको यो उपलब्धिले अफगानिस्तानका अन्य महिलाहरूलाई पनि आफ्ना सपनाहरू पूरा गर्न प्रेरित गर्नेछ।

उनले भनिन्, ‘मेरो जन्म यस्तो देशमा भएको हो, जहाँ सपना देख्ने महिलाहरूमाथि आक्रमण हुन्छ। मलाई धेरै खुसी लागेको छ कि मैले यसका विरुद्ध लडाइँ लडेँ।’

उनले थपिन्, ‘मलाई आशा छ कि आगामी पुस्ता यहाँ आउनेछ र कुनै डरविना आफ्नो देशको प्रतिनिधित्व गर्नेछ।’

हासिमीले आफ्नी बहिनी युल्दुजको पदचाप पछ्याउँदै १५ वर्षको उमेरमा साइकल चलाउन सुरु गरेकी थिइन्। युल्दुज पनि अन्तर्राष्ट्रिय स्तरकी साइकल चालक हुन्। यद्यपि, उनीहरूको गृहप्रान्त फर्याबमा साइकल चलाउनु खतरनाक थियो।

हासिमीले यसअघि रोयटर्ससँग भनेकी थिइन्, ‘म पुरुष बनेर ट्रेनिङ लिन्थेँ। मानिसहरूले मलाई नचिनून् र ममाथि आक्रमण नगरून् भनेर म दुई वा तीनवटा फरक-फरक मास्क लगाउँथेँ।’

साइकल चलाउँदा मानिसहरूले आफूतिर ढुङ्गा हान्ने हुन् कि भन्ने डर आफूलाई भइरहने उनले बताएकी थिइन्।

इटालीकी पूर्व विश्व च्याम्पियन एलेसान्द्रा क्यापेलोटोको मद्दतले हासिमी अब इटालीमा बस्छिन् र त्यहीँ ट्रेनिङ लिन्छिन्।

अफगानिस्तानमा आफ्नो जीवनलाई सम्झिँदै हासिमीले तालिबानले ‘हाम्रो स्वतन्त्रता खोसेको’ बताइन्।

उनले भनिन्, ‘यो रजत पदकले अफगान महिलाहरूको साहसलाई दर्शाउँछ। म यसबाट धेरै खुसी छु।’

उनले थपिन्, ‘म एक्लो छैन। मलाई थाहा छ कि धेरै देशका लाखौँ महिलाहरू मेरो पछाडि छन्। उनीहरूको पनि यही सपना छ र उनीहरू मसँगै उभिएका छन्।’

हासिमी र उनकी बहिनीले २०२४ को पेरिस ओलम्पिकमा भाग लिएका थिए। अब उनीहरूको नजर २०२८ को लस एन्जलस ओलम्पिकमा छ।

हासिमीले भनिन्, ‘म कहिल्यै हार मान्न चाहन्नँ। आशा छ कि हामी लस एन्जलसमा फेरि के हुनसक्छ भनेर देख्न पाउनेछौँ।’