एजेन्सी। नेपालसँग सीमा जोडिएको भारतको सिक्किम राज्यका विभिन्न भूभागमा बाढी र पहिरोका कारण जनजीवन अस्तव्यस्त बनेको छ। विशेष गरी सिक्किमको ग्याल्सिङ जिल्लास्थित रिम्बी क्षेत्रमा गएको ठूलो पहिरोका कारण ३० भन्दा बढी घरहरू प्रत्यक्ष प्रभावित भएका छन्।

पहिरो प्रभावित ढलाननजिक बसोबास गर्ने कैयौँ परिवार थप पहिरो खस्ने र क्षति हुने डरले आफ्नो घर छाडेर सुरक्षित स्थानमा जान बाध्य भएका छन्। रिम्बी क्षेत्रको माथिल्लो भागबाट अचानक ठूलो मात्रामा हिलो, ढुङ्गा र मलबा बगेर तलतिर आउँदा घरहरूमा व्यापक क्षति पुगेको छ। यसका साथै सडक अवरुद्ध भई स्थानीय आवागमन र यातायात सेवासमेत पूर्ण रूपमा प्रभावित भएको छ।

सिक्किमका मुख्यमन्त्री प्रेमसिंह तामाङले ग्याल्सिङ जिल्लाको रिम्बी क्षेत्रमा गएको भीषण पहिरोप्रति गम्भीर चिन्ता व्यक्त गर्दै यस कठिन परिस्थितिमा सरकार जनताको साथमा दृढतापूर्वक उभिएको आश्वासन दिएका छन्। उनले नागरिकको सुरक्षा र कल्याण सरकारको सर्वोच्च प्राथमिकता रहेको बताउँदै स्थितिमाथि कडा निगरानी राखिएको जानकारी दिएका छन्।

सामाजिक सञ्जालमार्फत आफ्नो धारणा सार्वजनिक गर्दै मुख्यमन्त्री तामाङले लेखेका छन्, “गतराति ग्याल्सिङ जिल्लाको रिम्बीमा गएको भीषण पहिरोका कारण उत्पन्न परिस्थितिप्रति म अत्यन्त दुःखी र चिन्तित छु। अवस्था गम्भीर छ र जनताको सुरक्षा तथा कल्याण हाम्रो सर्वोच्च प्राथमिकता हो। यस कठिन समयमा रिम्बीका जनताको साथमा सरकार दृढतापूर्वक उभिएको छ।”

उनले सम्बन्धित अधिकारीहरूलाई उच्च सतर्कतामा रहन, अवस्थाको निरन्तर अनुगमन गर्न र सर्वसाधारणको सुरक्षाका लागि आवश्यक सबै कदम चाल्न निर्देशन दिइसकेको बताएका छन्।

यसैबीच, थप पहिरो र माटो-मलबा खस्ने जोखिम अझै कायम रहेकाले प्रभावित परिवारहरूलाई तत्काल उद्धार, राहत तथा क्षति मूल्याङ्कनको व्यवस्था मिलाउन स्थानीय बासिन्दाहरूले सम्बन्धित निकायसँग माग गरेका छन्। जोखिमयुक्त क्षेत्रका परिवारलाई सुरक्षित स्थानमा व्यवस्थापन गर्न एकीकृत राहत प्रयासको खाँचो रहेको स्थानीयको भनाइ छ।