नयाँदिल्ली। भारतको निर्वाचन आयोग (ईसीआई) विरुद्ध आह्वान गरिएको ठूलो विरोध प्रदर्शन सुरु हुनुअघि नै शनिबार व्यङ्ग्यात्मक अनलाइन अभियान ‘कक्रोच जनता पार्टी’ (सीजेपी) का प्रमुखसहित तीन जना शीर्ष नेताहरूलाई प्रहरीले नियन्त्रणमा लिएको छ।

युवाहरूको नेतृत्वमा सञ्चालित सीजेपीले सामाजिक सञ्जालमार्फत जानकारी दिए अनुसार, प्रदर्शनमा सहभागी हुन नयाँदिल्ली पुगेका आन्दोलनका प्रमुख अभिजित दिपकेसहित तीन नेतालाई विमानस्थलमा विमानबाट ओर्लिनेबित्तिकै प्रहरीले नियन्त्रणमा लिएको हो।

भारतीय निर्वाचन आयोगले देशभर सञ्चालन गरिरहेको मतदाता नामावली पुनरावलोकन प्रक्रियामा व्यापक अनियमितता भएको आरोप लगाउँदै विपक्षी दलहरूसँगै युवाहरूले केही सातादेखि सञ्चालन गर्दै आएको अभियानको निरन्तरताका रूपमा यो प्रदर्शन आयोजना गरिएको हो।

विपक्षी दलहरू र आलोचकहरूले आयोगको ‘विशेष सघन पुनरावलोकन’ प्रक्रियाका कारण लाखौँ वैध मतदाता मताधिकारबाट वञ्चित हुन सक्ने र यसबाट प्रधानमन्त्री नरेन्द्र मोदी नेतृत्वको सत्तारूढ हिन्दू राष्ट्रवादी भारतीय जनता पार्टी (भाजपा) लाई प्रत्यक्ष फाइदा पुग्ने गम्भीर आरोप लगाएका छन्।

यद्यपि, निर्वाचन आयोगले भने पुनरावलोकन प्रक्रियामा कुनै पनि किसिमको अनियमितता नभएको भन्दै आरोपहरूको खण्डन गरेको छ। दोहोरो नाम परेका, बसाइँसरेका तथा अयोग्य मतदाताहरूको नाम नामावलीबाट हटाएर नामावलीलाई पारदर्शी बनाउनु यस प्रक्रियाको मुख्य उद्देश्य रहेको आयोगको दाबी छ।

यसैबीच, विपक्षी आम आदमी पार्टीका नेता अरविन्द केजरीवालले विज्ञप्ति जारी गर्दै सरकारको यो कदमको कडा शब्दमा आलोचना गर्नुभएको छ। “यो आधिकारिक भयो… हामी मोदीको पूर्ण तानाशाही शासनमा बाँचिरहेका छौँ,” केजरीवालले भन्नुभयो। विमानबाट ओर्लिनेबित्तिकै आन्दोलनकारी युवा नेताहरूलाई पक्राउ गरिनुले सरकारभित्र अभूतपूर्व स्तरको त्रास र डर रहेको प्रस्ट पारेको उहाँको भनाइ थियो।

सम्भावित प्रदर्शन र झडपलाई ध्यानमा राख्दै प्रदर्शनकारीहरूलाई राजधानीको मध्य भागमा रहेको मुख्य प्रदर्शनस्थलसम्म पुग्न नदिन शुक्रबारदेखि नै दिल्लीमा सुरक्षा व्यवस्था निकै कडा पारिएको छ। सुरक्षाका लागि हजारौँको संख्यामा प्रहरी तथा अर्धसैनिक बलका सुरक्षाकर्मीहरू परिचालन गरिएका छन्।

प्रशासनले सतर्कता अपनाउँदै दर्जनौँ मेट्रो स्टेसनहरू बन्द गराएको छ भने दिल्ली जोड्ने विभिन्न रेल सेवाहरूसमेत रद्द गरेको छ। यसका साथै प्रदर्शनस्थल र आसपासका सम्भावित प्रभावित क्षेत्रहरूमा अस्थायी रूपमा मोबाइल इन्टरनेट सेवा बन्द गरिएको छ।

शनिबार प्रसारित टेलिभिजन दृश्यहरूमा मध्य दिल्लीका विभिन्न क्षेत्रमा भेला भएका प्रदर्शनकारीहरूलाई प्रहरीले लखेट्दै र नियन्त्रणमा लिएर सवारीसाधनमा हाल्दै गरेको देखिएको छ। स्थानीय सञ्चारमाध्यमहरूका अनुसार हालसम्म २०० भन्दा बढी प्रदर्शनकारीहरूलाई प्रहरीले नियन्त्रणमा लिइसकेको छ।

शनिबारको यस प्रदर्शनलाई गत जुलाई महिनामा सीजेपीले गरेको व्यापक जनपरिचालनकै निरन्तरताका रूपमा हेरिएको छ। त्यसबेला सरकारी परीक्षामा भएको धाँधली र विवादपछि चर्किएको सो आन्दोलनले भारतका शिक्षा मन्त्रीलाई राजीनामा दिन बाध्य पारेको थियो।

यसपटक पुनः सडकमा उत्रिएका आन्दोलनकारीहरूले मतदाता नामावली पुनरावलोकनमा धाँधली भएको आरोप लगाउँदै भारतीय निर्वाचन आयोगका प्रमुख ज्ञानेश कुमारले तत्काल पदबाट राजीनामा दिनुपर्ने मुख्य माग राखेका छन्।