काठमाडौं। लगातारको वर्षापछि बुढीगण्डकी नदीमा आएको विनाशकारी बाढीले निर्माणधीन चारवटा जलविद्युत् आयोजनामा गम्भीर क्षति पुर्‍याएको छ। प्रारम्भिक विवरण अनुसार बाढीले आयोजनाका मुख्य क्याम्प, निर्माण उपकरण, सामग्रीका साथै बेलिब्रिज र पहुँच सडकहरू बगाएको तथा क्षति पुर्‍याएको छ।

सबैभन्दा बढी क्षति ३४१ मेगावाट क्षमताको बुढीगण्डकी जलविद्युत् आयोजना (टाइम्स इनर्जी प्रालिद्वारा प्रवर्द्धित) मा भएको छ, जसको मुख्य क्याम्प क्षेत्र र ठूला निर्माण उपकरणहरू बाढीले पूरी तरह बगाएर लगेको छ।

यसैगरी, बाढीका कारण अन्य तीनवटा आयोजनाहरूमा पनि भारी नोक्सानी पुगेको छ:

• २४.५ मेगावाट को दोभान खोला जलविद्युत् आयोजना

• ३०.५९ मेगावाट को यारु खोला जलविद्युत् आयोजना

• १६ मेगावाट को माछा खोला जलविद्युत् आयोजना

प्रारम्भिक रिपोर्ट अनुसार बाढीले आयोजना स्थलका आवास भवन, बेलिब्रिज र पहुँच सडकका पुलहरू क्षतिग्रस्त बनाएको छ। आयोजना स्थलसम्म पुग्ने बाटो अवरुद्ध हुनाका साथै निर्माण सामग्री र महत्त्वपूर्ण मेसिनरी उपकरणहरू बगाउँदा निर्माण कार्य पूर्ण रूपमा प्रभावित भएको छ।

क्षेत्रीय अवस्था र क्षतिको पूर्ण विवरण संकलन गर्ने कार्य भइरहेको जनाइएको छ।