रियाद। साउदी अरबको पूर्वी प्रान्त दमामस्थित किङ फहद अन्तर्राष्ट्रिय विमानस्थललाई लक्षित गरी इरान समर्थित हुथी विद्रोहीहरूले गरेको ड्रोन आक्रमणमा परी कम्तीमा एक जनाको मृत्यु भएको छ भने अन्य आठ जना घाइते भएका छन्।

साउदी अरबको नागरिक उड्डयन महानिर्देशनालय (जीएसीए) ले बुधबार साँझ भएको उक्त आक्रमण र मानवीय एवं भौतिक क्षतिको पुष्टि गरेको छ। घाइते आठै जनालाई उपचारका लागि तत्काल स्थानीय अस्पताल पुर्‍याइएको र क्षतिको वास्तविक मूल्यांकन भइरहेको जीएसीएले जनाएको छ।

उता, साउदी नेतृत्वको यमन गठबन्धनका प्रवक्ता ब्रिगेडियर जनरल तुर्की अलमालिकीले पूर्वी प्रान्तलाई लक्षित गरी आएका चारवटा मानवरहित हवाई यान (ड्रोन) लाई हवाई प्रतिरक्षा प्रणालीले नष्ट गरेको दाबी गरेका छन्।

दमाम विमानस्थलमा भएको यस घातक आक्रमण लगत्तै अमेरिकी विदेश मन्त्रालयले साउदी अरबमा कार्यरत आफ्ना अत्यावश्यकबाहेकका सरकारी कर्मचारी र उनीहरूका परिवारलाई तत्काल फिर्ता हुन आदेश दिएको छ।

अमेरिकी विदेश मन्त्रालयका प्रवक्ता टोमी पिगोटले हुथीहरूले नागरिक पूर्वाधार र विमानस्थललाई लक्षित गरी शत्रुतापूर्ण गतिविधि बढाएकाले कर्मचारीको सुरक्षालाई सर्वोच्च प्राथमिकता दिँदै यो निर्णय लिइएको स्पष्ट पारेका छन्।

यता, भारतीय विदेशमन्त्री एस. जयशंकरले पनि पश्चिम एसियामा बढ्दै गएको क्षेत्रीय तनावप्रति गम्भीर चिन्ता व्यक्त गर्दै भारतले संवाद र कूटनीतिमार्फत शान्ति कायम गर्ने हरेक पहललाई समर्थन गर्ने बताएका छन्। यसअघि अक्टोबर १० मा किङ खालिद अन्तर्राष्ट्रिय विमानस्थलमा भएको यस्तै आक्रमणमा परी एक भारतीय नागरिकसहित १३ जनाको ज्यान गएको थियो।

क्षेत्रीय तनाव उत्कर्षमा पुगेका बेला यमनी सेनाका सैन्य प्रवक्ता कर्णेल माजिद अल नाजिलीले नागरिक उड्डयन पूर्वाधारमाथि निरन्तर भइरहेका यस्ता आक्रमणहरूको कडा शब्दमा निन्दा गरेका छन्।

हुथी सेनाले एकै दिनमा चौथो पटक अल रय्यान विमानस्थललाई समेत निशाना बनाएको पुष्टि गर्दै उनले विमानस्थल जस्ता सार्वजनिक सम्पत्तिमाथि हमला गर्नु यमनी जनताको आवतजावत गर्ने स्वतन्त्रता खोस्ने र उनीहरूमाथि नाकाबन्दी लगाउने योजनाबद्ध कदम भएको टिप्पणी गरेका छन्।

साउदी अरबका किङ खालिद र अभा अन्तर्राष्ट्रिय विमानस्थलहरूमा शृङ्खलाबद्ध रूपमा भइरहेका यस्ता आक्रमणहरूले समग्र पश्चिम एसियाको हवाई सुरक्षा र क्षेत्रीय शान्तिलाई नै गम्भीर जोखिममा पारेको छ।