काठमाडौं । अमेरिकी डेमोक्र्याटिक सांसद इल्हान ओमारको समस्या घट्नुको सट्टा झन् बढ्दै गएको छ। उनीमाथि लागेका अध्यागमन धाँधलीका आरोपहरूपछि अब नक्कली विवाहसँग जोडिएका पुराना मुद्दाहरूको नयाँ ढङ्गले छानबिन सुरु गरिएको छ।

सङ्घीय अनुसन्धान एजेन्सीहरूको पछिल्लो कारबाहीपछि यो मामला फेरि चर्चाको केन्द्रमा आएको छ। सन् २०१६ मा ओबामा प्रशासनका बेला पनि इल्हान ओमारमाथि अनुसन्धान गरिएको थियो। त्यस समय अनुसन्धानकर्ताहरूले इल्हान ओमारले एक व्यक्तिसँग ‘नक्कली विवाह’ गरेको केही प्रमाणहरू प्राप्त गरेका थिए।

उनीमाथि आफ्नै दाजुसँग विवाह गरेको गम्भीर आरोप लगाइएको थियो। यद्यपि, ५ वर्षको कानुनी सीमा (हदम्याद) समाप्त भएका कारण त्यसबेला गम्भीर आपराधिक अभियोग दर्ता गर्न सकिएको थिएन। अहिले तिनै पुराना आरोपहरू र कागजातहरूको पुनः अनुसन्धान भइरहेको छ।

आलोचकहरू र मिडिया रिपोर्टहरूमा लामो समयदेखि इल्हान ओमारले अमेरिकी नागरिकता वा ग्रिन कार्ड प्राप्त गर्न मद्दत पुर्‍याउने उद्देश्यले अहमद नुर सेद एल्मी नामक व्यक्तिसँग ‘नक्कली विवाह’ गरेको दाबी गरिँदै आएको छ। तर, इल्हान ओमारले आफूमाथि लागेका यी सबै आरोपहरूलाई निरन्तर अस्वीकार गर्दै आएकी छिन्।

हालै ‘होमल्यान्ड सेक्युरिटी इन्भेस्टिगेसन्स’ ले वासिङ्टन डिसीस्थित इल्हान ओमारको निवासमा छापा मारेको थियो। अनुसन्धान एजेन्सीहरूको मुख्य ध्यान इल्हान ओमार वा उनका बुबाले अमेरिकी नागरिकताका कागजातहरूमा गलत विवरण वा तथ्याङ्क पेश गरेका थिए कि थिएनन् भन्नेमा केन्द्रित रहेको छ।

सीमा अधिकारी टम होमनका अनुसार, यदि यी आरोपहरू प्रमाणित भएमा इल्हान ओमारको अमेरिकी नागरिकता रद्द हुन सक्छ। ओमारमाथि अध्यागमन धाँधली मात्र नभई वित्तीय सम्पत्तिलाई लिएर पनि छानबिन भइरहेको छ। वासिङ्टनका शीर्ष सङ्घीय अभियोजकले इल्हान ओमारको वित्तीय विवरण र उनका श्रीमान्को व्यावसायिक मूल्याङ्कनमा भेटिएका गडबडीहरूको छुट्टै अनुसन्धान भइरहेको पुष्टि गरेका छन्।