काभ्रेपलाञ्चोक। प्राकृतिक विपदबाट क्षतिग्रस्त बीपी राजमार्गको सिन्धुली बर्खेखोला-पिप्ले सडकखण्डमा जापान अन्तर्राष्ट्रिय सहयोग नियोग (जाइका) ले पुनःनिर्माणको काम सुरु गरेको छ। सो खण्डसँगै अन्य तीन खण्डमा पनि पुनःनिर्माणले तीव्रता पाएको डिभिजन सडक कार्यालय भक्तपुरको भनाइ छ।

कार्यालयका अनुसार बर्खेखोला-पिप्ले सडकखण्ड पुनःनिर्माणको लागि जाइकासँग रु दुई अर्ब ६० करोडमा सम्झौता भई काम सुरु भएको हो। डिभिजन प्रमुख सुमन योगेशले जाइकाले हालै काम सुरु गरेको जानकारी दिए। यस्तै, पिप्लेदेखि काभ्रेपलाञ्चोकको भकुण्डेबेँसीसम्मको खण्डमा पुनःनिर्माणको काममा हालसम्म ५२ प्रतिशत भौतिक प्रगति भएको उनले बताए।

उनका अनुसार डालाबेँसीदेखि चारसयबेँसीसम्म (आठ दशमलव पाँच किमी) पुनःनिर्माणको जिम्मा पाएको खानी-एवान-कमलजीत जेभीले २०८४ को जेठ अन्त्यसम्म निर्माणको काम सम्पन्न गर्ने उल्लेख गरेको छ।

यस्तै चारसयबेँसीदेखि भकुण्डेबेँसीसम्म (११ दशमलव आठ किमी) सडक लामा-नवकान्तिपुर जेभीले आगामी २०८४ असार १७ गतेभित्र काम सम्पन्न गर्ने गरी प्रक्रिया अघि बढाएको योगेशको भनाइ छ।

यसैगरि पिप्लेदेखि डालाबेँसी (दुई दशमलव तीन किमी) सडकखण्डको जिम्मा पाएको उमा एण्ड कम्पनी–भण्डारी जेभीले २०८४ कात्तिक २६ गतेसम्म निर्माण सक्नेछ। योगेशले बीपी राजमार्ग पुनःनिर्माणको काम लक्ष्य अनुरुप नै भइरहेको स्पष्ट पारे।

विसं २०८१ असोज दोस्रो साता रोशी खोलाको बाढीका कारण बीपी राजमार्गको काभ्रेपलाञ्चोक नमोबुद्धस्थित दाप्चाखोला १ नं पुलदेखि सिन्धुलीको नेपालथोकसम्म २९ किमी सडक पूर्ण रूपमा क्षति भएको थियो।

क्षतिग्रस्त राजमार्गमध्ये काभ्रेपलाञ्चोकतर्फको २५ दशमलव ११ किमी सडक तीन खण्डमा पुनःनिर्माण भइरहेको छ। आगामी वर्षायाम अघि नै निर्माणाधीन तीन खण्डमा एक लेयरको कालोपत्रे गर्ने गरी तयारी भइरहेको योगेशले बताए। उनका अनुसार बाढीबाट क्षतिग्रस्त बीपी राजमार्ग ‘डेडिकेटेड डबल लेन’ मा पुनःनिर्माण भइरहेको हो।

सो राजमार्गअन्तर्गत काभ्रेपलाञ्चोकभित्र पर्ने पिप्लेदेखि डालाबेँसीसम्मको दुई दशमलव ३ किमी सडक पुनःनिर्माण गर्न उमा एण्ड कम्पनी-भण्डारी अमरज्योति जेभीसँग रु ६८ करोड ८० लाख, डालाबेँसीदेखि चारसयबेँसीसम्मको सडकका लागि लामा*नव कान्तिपुर जेभीसँग रु एक अर्ब ४२ करोड र चारसयबेँसीदेखि भकुण्डेबेँसीसम्मको सडक पुनःनिर्माणका लागि खानी-एवान-कमलजीत जेभीसँग रु एक अर्ब ३३ करोडमा सम्झौता भएको छ।

यसैबीच बीपी राजमार्गमा हाल पुनःनिर्मित सडकबाटै सवारी आवागमन गराइएको जानकारी दिइएको छ। “एक दुई स्थानमा साघुँरो भएकाले डाइभर्सन बनाएर दुईतर्फी आवागमन गराइएको छ, अन्यत्र अप्ठेरो छैन,” योगेशले भने।

उनका अनुसार चौकीडाँडा र पिन्थलीमा भिरालो भएकाले हाल मर्मत भइराखेको र डाइभर्सन गरिएको छ। डालाबेँसी–पिप्ले खण्डमा पनि त्यस्तै व्यवस्था गरिएको छ।

हाल पुनःनिर्मित सडकबाटै आवागमन गराइए पनि जाम नहुने योगेशको दाबी छ। वर्षा भई सडक माथिबाट लेदो तथा पहिरो गई अवरुद्ध भए आधादेखि केही घण्टामै सडक खुलाउने गरी सामग्री व्यवस्थापन गरिएको उनले बताए।

नेपालको पूर्वी तथा मध्यपहाडी क्षेत्रलाई संघीय राजधानी काठमाडौंसँग जोड्ने छोटो मार्गका रूपमा उक्त राजमार्गलाई लिइन्छ।

क्षतिग्रस्त खण्ड पुनःनिर्माणका लागि सरकारले कुल रु आठ अर्ब ५० करोड स्रोत सहमति दिएको थियो। जसमध्ये काभ्रेपलाञ्चोकतर्फका तीन सडकखण्डलाई रु सात अर्ब ५० करोड र सिन्धुलीको एक सडकखण्डलाई रु एक अर्बको स्रोत सहमति दिइएको छ।

योगेशका अनुसार पाँच वटा पुललाई दुई लेनमा परिणत गर्ने योजना छ। तीनवटै खण्डमा छ दशमलव तीन किलोमिटर आरसीसी पर्खाल निर्माण हुनेछ। जापान सरकारको अनुदान सहयोगमा आर्थिक वर्ष २०५३/०५४ देखि बीपी राजमार्ग (धुलिखेल-सिन्धुली–बर्दिबास १६० किमी सडक) निर्माण सुरु गरिएको थियो। खण्डखण्ड विभाजन गरी निर्माण सम्पन्न भएको राजमार्ग विसं २०७२ असार १८ गते जापान सरकारले नेपाल सरकारलाई हस्तान्तरण गरेको थियो।