नेपालको स्याटेलाइटले ३ देशका तस्वीर पठायो – Dcnepal

नेपालको स्याटेलाइटले ३ देशका तस्वीर पठायो

NepaliSat-1, a cube satellite weighing 1.3 kg, was launched into space from Virginia, US, in the wee hours of Thursday, April 18, 2019. It mentions names of the scientists who developed it. Photo courtesy: NASA


टोकियो । जापानमा निर्माण भएको नेपालको पहिलो न्यानो स्याटेलाईटले तीन देशको तस्विर पठाएको छ । जापानमा स्पेस ईन्जिनियरिङ अध्ययनरत आभाष मास्के र स्नातकोत्तर तहका विद्यार्थी हरिराम श्रेष्ठले तयार पारेको भू उपग्रह नेपाली स्याट–१ ले भुटान, बंगलादेशको ढाका तथा भारतका आसाम, दार्जिलिङ र सिक्किमका भूभागको तस्बिर खिचेको हो ।

नेपाल विज्ञान तथा प्रविधि प्रज्ञा प्रतिष्ठान (नाष्ट) ले आफ्नो कार्यालयमा सूचना प्रवाह गर्ने माध्यम ग्राउण्ड स्टेसन जडान गरेसँगै नेपाली स्याट–१ पहिलो पटक ती तस्बिर लिन सफल भएको हो । करिब एक महिनाअघि नेपाली स्याट–१ ले उक्त तस्बिर लिएको जानकारी जापानस्थित क्यूटेक विश्वविद्यालयले दिएको नाष्टका प्रविधि संकाय प्रमुख रवीन्द्रप्रसाद ढकालले जानकारी दिए ।

नाष्टमा जडान गरिएको रेडियो उपकरणमा समस्या भएका कारण उपग्रहले नेपालको तस्विर भने खिच्न नसकेको बताईएको छ । नाष्टले आफ्ना प्राविधिक इञ्जिनियरलाई ग्राउण्ड स्टेसनबारे थप अध्ययनको लागि जापान पठाउने तयारी गरेको जनाएको छ । नाष्टले भूउपग्रहबारे तीनदेखि चार दिनको तथ्यांक संकलन गरेर अध्ययन गर्दा ती तस्बिर कैद भएको सूचना प्राप्त गरेको थियो । नेपालले गत वैशाख ४ गते नेपाली स्याट–१ नामक उक्त भूउपग्रह प्रक्षेपण गरेको थियो ।

नेपाली स्याट–१ मा पाँच मेगा पिक्सलको क्यामेरा जडान गरेका कारण यसबाट अलि धमिलो तस्बिर कैद हुने बताइएको छ ।
गत साउन पहिलो साता नेपाली स्याट–१ ले पहिलो पटक सूर्य र पृथ्वीका साथै चीन र भारत सीमानाका खिचेका तस्बिर जापानको शिक्षा मन्त्रालयले अनुमति दिएपछि नाष्टले सार्वजनिक गरेको थियो ।

नेपाली स्याट–१ सँग दुईदेखि तीन वर्षसम्म तस्बिर संकलन गर्ने क्षमता छ । जापानको ‘बर्ड–३’ परियोजना मार्फत् मुलुकले उक्त भूउपग्रहको काम अघि बढाएको थियो। नेपाली स्याट–१ सँगै गत वैशाख ४ गते श्रीलंकाले रावण–१ र जापानले युवुसु नामक भूउपग्रह एकैसाथ प्रक्षेपण गरेका थिए । नेपाल सरकारले सन् २०१७ देखि उक्त भूउपग्रह निर्माणको योजना अघि बढाएको थियो ।

स्याटेलाइट १० सेन्टिमिटर लम्बाई, चौडाई र उचाई भएको छ । सजिलै हातमा बोक्न सकिने स्याटेलाइटमा नेपालको झण्डा छ भने नाष्टको लोगोसहित विद्यार्थीहरुको नाम पनि उल्लेख छ । स्याटेलाइटको तौल एक किलो तीन सय ग्राम रहेको छ । यसमा नेपाल सरकारले एक करोड ८२ लाख रुपैयाँ खर्चेको छ । स्याटेलाईट जापानमा निर्माण भएपनि अमेरिकी अन्तरिक्ष कम्पनी अर्बिटल ए टिके मार्फत प्रक्षेपण गरिएको थियो । नेपाली स्याट १ ले प्रत्येक ९० मिनेटमा पृथ्वीको एक चक्कर लगाउने गरेको छ । दिनमा १६ पटक पृथ्वीमा चक्कर लगाउँदा यो चारपटक नेपालको आकाशमा आउने गरेको नास्टले जनाएको छ ।

Facebook Comment


सम्बन्धित खवर

ताजा भिडियो