काठमाडौं। दिपेन्द्र सिंह ऐरीले उत्कृष्ट ब्याटिङ गरेपछि दक्षिण एसियाली खेलकुद अन्तर्गत क्रिकेटको उद्घाटन खेलमा नेपालले श्रीलंकालाई १७३ रनको बलियो लक्ष्य दिएको छ । टियु क्रिकेट मैदान किर्तिपुरमा टस हारेर पहिले ब्याटिङको निम्तो पाएको नेपालले निर्धारित २० ओभरमा ५ विकेटको क्षतिमा १७२ रन बनाएको हो ।

टेस्ट मान्यता प्राप्त श्रीलंकाको अण्डर २३ टिमविरुद्ध खेलिरहेको नेपालले बनाएको यो स्कोर खेल जित्न सकिने स्कोर मानिन्छ । टि–२० मा नेपालको राष्ट्रिय टोलीको यो दोस्रो ठूलो स्कोर हो । यसअघि गत जुलाइमा नेपालले मलेसियाविरुद्ध ६ विकेटको क्षतिमा बनाएको १७३ रनको स्कोर नेपालको टि–२० मा सर्वाधिक स्कोर हो ।

३४ बलमा अर्धशतक बनाएका दिपेन्द्र सिंह ऐरीले कूल ४४ बल खेलेर नटआउट ७२ रन बनाए । यसका लागि उनले ४ चौका र ३ छक्का प्रहार गरे । पवन सर्राफले छोटो इनिङमा उत्कृष्ट ब्याटिङ गर्दै १३ बलमा २२ रन बनाए । कप्तान ज्ञानेन्द्र मल्ल र विनोद भण्डारीले समान २१ रन तथा आरिफ शेखले १९ रन बनाए । श्रीलंकाका लागि कमिन्डु मेन्डिसले २ तथा दुविन्दु तिलकरत्ने, कविस्का अन्जुला तथा अथिा फर्नान्डोले १–१ विकेट लिए ।