काठमाडौं। अखिल नेपाल फुटबल संघ (एन्फा)ले देशका विभिन्न स्थानमा रहेका आफ्ना पूर्वाधारहरु कोरोनाभाइरस संक्रमित वा आशंका गरिएकालाई आइसोलेसनमा राख्नको लागि प्रयोग गर्न दिने भएको छ । एन्फाले एक विज्ञप्ति जारी गर्दै आवश्यक परेको खण्डमा अस्थायी क्वारेन्टाइन र आइसोलेसनका लागि आफ्ना पूर्वाधारहरु प्रयोग गर्न दिने जानकारी गराएको हो ।

ललितपुरको एन्फा कम्प्लेक्सको होस्टल, बुटवल र धरानको फुटबल एकेडेमीको होस्टल र रौतहटको महिला फुटबल एकेडेमीको होस्टललाई नेपाल सरकार, प्रदेश सरकार या स्थानीय सरकारले प्रयोग गर्न सक्ने एन्फाले जारी गरेको विज्ञप्तिमा उल्लेख छ । एन्फाले विज्ञप्ति मार्फत नेपाल संक्रमणको उच्च जोखिममा रहेको जनाउँदै सतर्कता पूर्वक रहन समेत आह्वान गरेको छ।