बैंकबाट झुक्किएर सयौंको खातामा अरबौं रुपैयाँ गयो, अदालतले भन्यो ‘बैकले पैसा फिर्ता पाउँदैन’ – Dcnepal

बैंकबाट झुक्किएर सयौंको खातामा अरबौं रुपैयाँ गयो, अदालतले भन्यो ‘बैकले पैसा फिर्ता पाउँदैन’

काठमाडौं। बैंकिङ इतिहासकै सबैभन्दा ठूलो गल्ती गरेर सयौं व्यक्तिको खातामा अरबौं रुपैयाँ रकम पठाएको बैंकले त्यो रकम फिर्ता नपाउने भएको छ । अमेरिकाको सिटीबैंकले झुक्किएर ट्रान्सफर गरेको झण्डै ५०० मिलियन डलर (५८ अर्ब नेपाली रुपैयाँ) फिर्ता लिन नसक्ने अमेरिकाको एक जिल्ला अदालतले फैसला गरेको छ ।

सीएनएनको रिपोर्टअनुसार सिटीबैंकले रेभ्लोन नामक सौन्दर्य प्रसाधन उत्पादक कम्पनीको ऋण एजेन्टको रुपमा काम गरिरहेको थियो । बैंकले रेभ्लोन कम्पनीलाई ऋण दिएका व्यक्तिहरुको खातामा ब्याजवापत ८ मिलियन डलर (९३ करोड रुपैयाँ) पठाउनुपर्ने थियो । तर, बैंकले झुक्किएर कूल ९०० मिलियन डलर (१ खर्ब ५ अर्ब रुपैयाँ) रेभ्लोनका ऋणदाताहरुको खातामा पठायो ।

केही ऋणदाताहरुले झुक्किएर आएको रकम फिर्ता पनि गरे र अरुले फिर्ता गरेनन् । गएको अगष्टमा सिटीबैंकले आफूले पैसा फिर्ता पाउनुपर्ने दावीसहित अदालतमा मुद्दा हाल्यो । तर, बैंकले अझै पनि १० वटा लगानी सल्लाहकार फर्मबाट ५०० मिलियन डलर रकम फिर्ता पाएको छैन ।

अमेरिकाको कानुनले यसरी झुक्किएर आफ्नो खातामा आएको पैसा खर्च गर्ने व्यक्तिलाई सजायको व्यवस्था तरेको छ । तर, न्यूयोर्कको कानुनमा एउटा विशेष अपवाद छ । यो अपवादअनुसार जुन व्यक्तिको खातामा पैसा आएको छ त्यो व्यक्ति त्यो पैसा पाउने हकदार हो भने उसले झुक्किएरै आएको भए पनि त्यो पैसा राख्न पाउँछ ।

यो घटनामा पनि रेभ्लोनका ऋणदाताहरुले यही अपवाद प्रयोग गरे । खासमा उनीहरुले रेभ्लोनलाइ ऋण दिएका थिए र उनीहरु त्यो ऋण फिर्ता पाउने हकदार थिए । तर, त्यो पैसा त्यतिबेलै फिर्ता दिनुपर्ने नभइ निश्चित समयपछि फिर्ता दिइनुपर्ने थियो, बैंकले त उनीहरुलाई ब्याज मात्र पठाउन खोजेको थियो ।

ऋणदाताहरुले भने आफूहरुलाई बैंकले प्रिपेमेन्ट गरेको (समय अगावै ऋण तिरेको) जस्तो लागेको बताए । बैंकबाट झुक्किएर आएको रकम त्यति नै थियो जति रेभ्लोनले उनीहरुसँग ऋण लिएको थियो । यद्यपि त्यो रकम त्यतिबेलै फिर्ता गर्नुपर्ने नभइ अझै केही समयपछि मात्रै तिर्ने तय थियो ।

Facebook Comment


सम्बन्धित खवर

ताजा भिडियो