काठमाडौं । बंगलादेशमा बिहीबार नयाँ राष्ट्रपति चयनका लागि मतदान हुँदैछ। ३५ वर्षको लामो अन्तरालपछि पहिलो पटक देशको राष्ट्रपति पदका लागि प्रत्यक्ष रूपमा संसद्भित्र मतदान हुन लागेको हो।

राष्ट्रपति पदको दौडमा मुख्य प्रतिस्पर्धा सत्ताधारी बंगलादेश नेसनलिस्ट पार्टीका दिग्गज नेता मिर्जा फखरुल इस्लाम आलमगीर र ११ दलीय विपक्षी गठबन्धनका उम्मेदवार कर्नेल (सेवानिवृत्त) ओली अहमदबीच रहेको छ।

निर्वाचन आयोगका अनुसार मतदान जातीय संसद् (संसद् भवन) मा दिउँसो २ बजेदेखि साँझ ५ बजेसम्म सञ्चालन हुनेछ। आयोगले गत अगस्ट १६ मा नै दुवै उम्मेदवारको मनोनयन पत्र वैध ठहर गरिसकेको थियो।

मिर्जा फखरुल इस्लाम आलमगीर बिएनपीका प्रमुख अनुहार हुन् भने लिबरल डेमोक्रेटिक पार्टी का अध्यक्ष कर्नेल (सेवानिवृत्त) ओली अहमद (बीर बिक्रम) जमात-ए-इस्लामीको नेतृत्वमा रहेको ११ दलीय विपक्षी मोर्चाका उम्मेदवार हुन्।

बुधबार बिएनपी संसदीय दलको बैठकका क्रममा फखरुलले आफ्नै पार्टीका सांसदहरूसँग समर्थनको अपिल गरे। लामो समयसम्म पार्टीको महामन्त्री रहेका फखरुल बैठकमा निकै भावुक बनेका थिए।

सांसदहरूलाई सम्बोधन गर्दै उनले भने, “मेरो कार्यकालमा मबाट कुनै गल्ती भएको भए वा अन्जानमा कसैको दिल दुखेको भए म क्षमाप्रार्थी छु।” उनले देशको स्वतन्त्रता र सार्वभौमसत्तासँग कहिल्यै सम्झौता नगर्ने संकल्पसमेत व्यक्त गरे।

चुनावी परिणाम सार्वजनिक भएलगत्तै नयाँ राष्ट्रपतिले शुक्रबार साँझ बंगभवनको दरबार हलमा बंगलादेशको २३औँ राष्ट्रपतिका रूपमा शपथ ग्रहण गर्नेछन्। पूर्वराष्ट्रपति मोहम्मद शहाबुद्दीनले स्वास्थ्यका कारण राजीनामा दिएपछि यो पद खाली भएको थियो।

संविधानअनुसार पद खाली भएको ९० दिनभित्र निर्वाचन गराउनुपर्ने संवैधानिक व्यवस्था छ। हाल संसद्का सभामुख हाफिज उद्दीन अहमद कार्यवाहक राष्ट्रपतिका रूपमा रहेका छन्। यसै वर्षको फेब्रुअरी १२ मा भएको आम निर्वाचनबाट बिएनपी सत्तामा फर्किएको थियो।

संसद्मा बिएनपीसँग दुई-तिहाइभन्दा बढी बहुमत रहेकाले प्रधानमन्त्री तारिक रहमानका घोषित उम्मेदवार मिर्जा फखरुल इस्लाम आलमगीरको जित लगभग निश्चित मानिएको छ। पेशोले अर्थशास्त्री रहेका फखरुल सन् १९९० को दशकमा बिएनपीमा आबद्ध भएका थिए। उनी यसअघि कृषि राज्यमन्त्री तथा स्थानीय सरकार मन्त्रीको जिम्मेवारीसमेत सम्हालिसकेका नेता हुन्।