काठमाडौं। पढाइका क्रममा जेलमा इन्टर्नसिपका लागि आएका एक विद्यार्थीले जेलमा प्रयोग गरिएका साँचोको फोटो खिचेर ह्वाट्सएपमा आफ्ना एक साथीलाई पठाएपछि उक्त जेलका सबै तालाहरु फेर्नुपर्ने भएको छ ।

साँचोको फोटो बाहिरिएर सुरक्षा जोखिम बढेपछि जर्मनीको यो जेलले अब ६ सय तालाहरु फेर्नुपर्नेछ जसको लागत ५० हजार युरो (७० लाख रुपैयाँ) पर्ने भएको छ । बर्लिननजिकैको हेडरिङ जेलमा आएका ती प्रशिक्षार्थीले आफूले गर्न लागेको नयाँ कामबारे फुर्ति लगाउन साँचोका फोटो एक ह्वाट्सएप ग्रुपमा शेयर गरेका थिए ।

ती विद्यार्थीले फोटो देखेपछि विशेषज्ञहरुले सजिलै नक्कली साँचो बनाउन सक्ने र नक्कली साँचोहरु पुग्न सक्ने जोखिमबारे सोच्न नसक्दा यस्तो परिस्थिति आएको हो । ६४७ कैदी बन्दीहरु राखिएको जेलबाट उनीहरु सामूहिक रुपमा भाग्न सक्ने खतरा भएपछि सबै ताला परिवर्तन गर्नुपर्ने बाध्यता भएको डेलीमेलले लेखेको छ । साँचोको फोटो लिक भएको जानकारीसँगै करिब २० जना कामदार ताला फेर्नको लागि खटाइएको र सुरक्षाका कारण उनीहरुले रातदिन काम गर्नुपर्ने समाचारमा जनाइएको छ ।