काठमाडौं। साउदी अरबमा बुधबार कोरोनाभाइरसको नयाँ ओमिक्रोन भेरिएन्ट पुष्टि भएको छ । साउदी अरबको सरकारी समाचार एजेन्सी एसपीएका अनुसार उत्तरी अफ्रिकाको एक देशबाट आएका व्यक्तिमा यो केस पुष्टि भएको हो । साउदी अरबमा ओमिक्रोन भेरिएन्टको संक्रमणको यो पहिलो पुष्टि भएको केस हो ।

एसपीएका अनुसार यी संक्रमित व्यक्ति साउदी अरबकै नागरिक हुन् । संक्रमित र उनको सम्पर्कमा आएका सबैलाई आइसोलेट गरिएको छ । मध्यपूर्व र उत्तरी अफ्रिकामा यो ओमिक्रोनको पहिलो केस हो । साउदीले आज नै कैयौं देशमाथि लगाएको यात्रा प्रतिबन्ध हटाएको छ । साउदीले पछिल्लो समय कोरोनासँग सम्बन्धित प्रतिबन्ध लगातार खुकुलो पार्दै गइरहेको छ ।

#وزارة_الصحة: رصد حالة إصابة بالسلالة المتحورة (أوميكرون) في المملكة لمواطن قادم من إحدى دول شمال أفريقيا.https://t.co/Xg81zucB42#واس_عام pic.twitter.com/41DlEd7RYX

— واس العام (@SPAregions) December 1, 2021

आज साउदीले भारत, इजिप्ट, पाकिस्तान, इण्डोनेसिया, ब्राजिल र भियतनाममाथि लगाएको यात्रा प्रतिबन्ध फुकुवा गरेको हो । अब यी ६ देशबाट मानिसहरु साउदी अरबमा जान सक्छन् । यी देशबाट पछिल्लो १४ दिनमा अन्य देशको यात्रा नगरेका व्यक्ति साउदी जान सक्छन् । साउदी जानेहरुले वैध पीसीआर नेगेटिभ रिपोर्ट भने देखाउनुपर्छ ।