काठमाडौं। भारतको नागाल्याण्डमा सेनाले गोली हानेर मारेका १४ जना सर्वसाधारणको विषयमा बबाल बढ्दै गइरहेको छ । नागाल्याण्डको पुलिसले सेनाको पूरै टुकडीविरुद्ध हत्या अभियोगमा मुद्दा दर्ता गरेर कारवाही अगाडि बढाएको छ । भारतको कानुनअनुसार यहाँको सेनामाथि यस्तो मुद्दा चलाउन केन्द्र सरकारले अनुमति दिनुपर्छ । यो कुरालाई लिएर केन्द्रीय संसदमा पनि बबाल भइरहेको छ ।

यही बीच घटनाका प्रत्यक्षदर्शीहरुले सेनाले सर्वसाधारणहरुलाई मारिसकेपछि उनीहरुको कपडा बदल्ने प्रयास गरेको दावी गरेका छन् । गोलीबारीको आवाज सुनेर घटनास्थलतिर गएका केही गाउँलेहरुका अनुसार सेनाले सर्वसाधारणहरुलाई मारिसकेपछि लाशको कपडा बदल्ने प्रयास गरेका थिए । यो गोलीबारीमा शोमवांग नामका व्यक्तिको पनि मृत्यु भएको थियो । उनकी बहिनीका अनुसार जब उनी घटनास्थल पुगिन् उनले शोमवांगलाई अर्धनग्न अवस्थामा पाइन् । उनको दावी अनुसार कैयौं सर्वसाधारणका लाशको कपडा बदलिएको थियो ।

इण्डिया टुडेले घटनास्थलमै गएर प्रत्यक्षदर्शीहरुसँग कुरा गरेर एक रिपोर्ट तयार पारेको छ । कीपवांग कोन्याक यो घटनाका प्रत्यक्षदर्शी हुन् जो फायरिङको आवाज सुनेर घटनास्थल पुगेका थिए । उनले इण्डिया टुडेसँग कुरा गर्दै आफू घटनास्थल पुग्दा एउटा पिकअप भ्यानलाई तीब्र गतिमा त्यहाँबाट गइरहेको देखेको बताए । जब स्थानीयले त्यो गाडीको पिछा गरे त्यसपछि सेनाका अरु ३ वटा गाडीहरु त्यहाँ भएको देखे ।

उनका अनुसार सेनाका जवानहरुले मृतकहरुको कपडा बदल्ने कोसिस गरिरहेका थिए । उनले प्रश्न गरे कि जब यो गलत पहिचानको घटना थियो भने सेनाका जवानहरुले मरिसकेका मानिसहरुको कपडा बदल्ने कोसिस किन गरिरहेका थिए ? स्थानीयले शोकवांगको कारमा गोलीको निशान र रगतका धब्बा देखेका थिए । त्यसैले उनीहरुलाई केही गडबड भएको शंका भएको थियो । त्यसपछि उनीहरुले गाडीहरु चेक गर्ने निर्णय गरेका थिए ।

त्यही बेला उनीहरुले त्यहाँ अर्को पिकअप भ्यान भेटे जसमा शवहरुलाई तिरपालले ढाकेर राखिएको थियो । शवको साथमा ट्रकको भिडियो खिचेका मनपेहले इण्डिया टुडेसँग भने ‘जब हामी यहाँ पुग्यौं त्यसपछि हामीले सेनाको पिकअप भ्यानमा शवहरु राखिएको देख्यौं । यो देखेर म रिसले आगो भएँ ।’

शनिबार नागाल्याण्डको मोन जिल्लास्थित ओटिंगको तिरु गाउँमा सेनाका जवानको गोलीबारीमा कोइला खानीमा काम गरेर फर्किरहेका मजदुरहरुको मृत्यु भएको थियो । स्थानीयका अनुसार यी मजदुरहरु शरेक शनिबार तिरु गाउँबाटै ओटिंग फर्किन्थे । प्रत्यक्षदर्शीहरुका अनुसार जब उनीहरु त्यहाँ पुगे उनीहरुले त्यहाँ लाइभ बम (नपड्किएका बम) पनि देखे ।

रोचक त के भने इण्डिया टुडेले एउटा भिडियो प्राप्त गरेको दावी गरेको छ जुन भिडियोमा सेनाको पिकअप भ्यानको नम्बर देखिएको छ र यो पिकअप भ्यानमा ६ वटा शव राखिएको छ । यसरी शवलाई गाडीमा राख्नुको उद्देश्य के थियो भन्ने प्रस्ट छैन तर यसबाट केन्द्र सरकारको बयानमाथि प्रश्न उठेका छन् । नागाल्याण्ड पुलिसले पनि आफ्नो रिपोर्टमा लेखेको छ ‘शवहरुलाई एक पिक अप गाडीमा बेरेर राखेर लुकाउने कोसिस भएको थियो ।