काठमाडौं। आसन्न राष्ट्रिय सभा निर्वाचनअन्तर्गत मधेस प्रदेशमा नेकपा एमाले र लोकतान्त्रिक समाजवादी पार्टी (लोसपा) बीच चुनावी एकता भएको छ ।

१२ माघमा हुने राष्ट्रिय सभाको निर्वाचनको लागि दुवै पार्टीले गठबन्धन घोषणा गर्दै आ-आफ्ना उम्मेदवारलाई साझा उम्मेदवारको रुपा प्रस्तुतसमेत गरेका छन् । बिहीबार जनकपुरधाममा दुवै पार्टीले संयुक्त रूपमा पत्रकार सम्मेलनको आयोजना गरे गठबन्धनको घोषणा गरेको हो ।

राष्ट्रिय सभा सदस्यको लागि अन्य कोटामा एमालेबाट उसमान अन्सारी र लोसपाबाट महिलातर्फ रुपा यादवले उम्मेदवारी दिने भएका छन् । महिला कोटामा उम्मेदवारी दिएकी एमालेकी बिनादेवी साहले भने आफ्नो उम्मेदवारी फिर्ता लिएकी छन् । पत्रकार सम्मेलनमा साहले पार्टीका आग्रहमा आफूहरूले उम्मेदवारी फिर्ता लिएको बताइन् ।

गठबन्धन घोषणा कार्यक्रममा एमाले सचिव रघुवीर महासेठले राष्ट्रिय सभाको निर्वाचनको लागि भएको गठबन्धन अन्य निर्वाचनमा पनि जान सक्ने बताए । राष्ट्रियताको सवालमा एमाले र लोसपाबीच समानता रहेकोले विचारहरू मिल्दै गए भने गठबन्धन लामो समयसम्म टिक्ने उनले बताएका छन् ।

कार्यक्रममा लोसाका प्रदेश अध्यक्ष तथा मधेस प्रदेशका संसदीय दलका नेतासमेत रहेको जितेन्द्र सोनलले मधेसको विषयमा अन्य राष्ट्रिय पार्टीभन्दा नेकपा एमाले राम्रो रहेको बताए । मधेस आन्दोलनकारीमाथि लागेको मुद्दा फिर्ता, जन्मसिद्ध नागरिकका सन्तानको नागरिकता, संविधान संशोधनलगायतका विषयमा एमालेले सकारात्मक रहेकोले विगतमा लोसपाले तत्कालीन प्रधानमन्त्री केपी शर्मा ओलीलाई समर्थन गरेको उनको भनाई थियो ।

गठबन्धन घोषणा कार्यक्रममा एमाले नेता लीलानाथ श्रेष्ठ, जुली महतो, लोसमा सांसद परमेशर साह, जयनुल राइन, रानी शर्मा तिवारीलगायतको सहभागिता रहेको थियो ।