काठमाडौं। कोरोना भाइरसको सङ्क्रमण बढेसँगै जुम्लामा एकीकृत सहायता कक्ष (हेल्प डेस्क) स्थापना गरिएको छ ।

कोभिड–१९ जिल्ला सङ्कट व्यवस्थापन समितिको निर्णयानुसार जिल्ला प्रशासन कार्यालय अगाडि हेल्प डेस्क स्थापना गरिएको हो । उक्त डेस्कबाट कोभिड– १९ विरुद्धको खोप लगाउने, शङ्कास्पद व्यक्तिका लागि आरडिटी र एन्टिजेन परीक्षण गर्ने, मास्क बैङ्कको व्यवस्था गर्ने र ज्वरो मापन तथा कोभिड–१९ बारेमा जनचेतना प्रदान गरिने प्रमुख जिल्ला अधिकारी विजयाकुमारी प्रसाईंले बताए ।

जिल्ला प्रशासन र जनस्वास्थ्य कार्यालय जुम्ला, चन्दननाथ नगरपालिका तथा कर्णाली स्वास्थ्य विज्ञान प्रतिष्ठान जुम्लाद्वारा सयुक्त रुपमा सो डेस्क स्थापना गरिएको जनस्वास्थ्य कार्यालय जुम्लाका प्रमुख कृष्णप्रसाद सापकोटाले बताए । मास्क, स्यानिटाइजर, आरडिटी, एन्टिजेन परीक्षण र खोपहरुको व्यवस्थापन जनस्वास्थ्य कार्यालयले गरेको छ । एकीकृत हेल्प डेस्कले जनस्वास्थ्यका मापदण्डहरुलाई प्रवद्र्धन गर्नेछ ।

विश्वव्यापी रूपमा फैलिरहेको कोरोना भाइरसबाट हुन सक्ने महामारीलाई दृष्टिगत गर्दै हेल्प डेस्क स्थापन गरी सञ्चालनमा ल्याएको प्रजिअ प्रसाइँले बताए। कोरोना सङ्क्रमित बिरामीको पहिचानका लागि एकीकृत हेल्प डेस्क सञ्चालनमा ल्याएको जनस्वास्थ्य कार्यालय जुम्लाले जनाएको छ । कोरोना भाइरस सङक्रमण हुन नदिन जनचेतनामूलक सन्देश प्रवाह गर्न पनि हेल्प डेस्कको महत्वपूर्ण योगदान हुने यहाँका स्थानीयवासी बताउँछन् ।

कोभिड–१९ का बारेमा जानकारी दिन र बिरामीको पहिचान तथा जाँच, सवारी साधनमार्फत जुम्लाबाट बाहिरिने र भित्रिने यात्रुहरुलाई कोरोना भाइरसबाट बच्ने उपाय र रोगका लक्षणबारे जानकारी गराउने उद्देश्यले हेल्प डेस्क स्थापना गरिएको चन्दननाथ नगरपालिका जुम्लाका जनस्वास्थ्य निरीक्षक क्षेत्रबहादुर महतले बताए।